OLOSAMO 23 - Embimbiliya - Bíblia Sagrada em Umbundu

Osamo ya Daviti.

¹ Yehova eye ungombo wange, ame si suki.

² O mekelaisa kovisenge vitalala. O songuaila kovava a tulumuha.

³ O kavuluisa utima wange. O ngendaisa volonjila viesunga mekonda lionduko yaye.

⁴ Ocili, ndaño mita vomaka yulembo wokufa, lacimue cĩvi ndi ci yokokela, momo ove o kasi lame. Ohunya yove lombueti yove vi ndemba ndemba.

⁵ O njalela omesa kovaso ovanyali vange. O mbuaveka kutue ulela. Okopo yange yi supoka.

⁶ Esanju lika li ñuama, lohenda, oloneke viosi viomuenyo wange, Kuenje numala vonjo ya Yehova, oloneke ka vi pui.