OLOSAMO 22 - Embimbiliya - Bíblia Sagrada em Umbundu

Kusongui wolonjimbi. Osamo ya Daviti. Elaka liaco, Osonge yomele.

¹ A Suku yange, a Suku yange, wa njandulukila nye? Nye o kasilili kupãla okuti ku ñuatisa, kuenje ku yevi olondaka viokuliyula kuange?

² A Suku yange, kutanya mbilikiya, puãi ku nambulula, ndaño kuteke, puãi si sangi epuyuko.

³ Ove puãi o kola, o tumãla kasivayo a va Isareli.

⁴ Votate va ku kolela, va ku kolela kuenje wa va popela.

⁵ Va ku vilikiya kuenje va popeliwa. Va ku kolela kuenje ka va kutiwile osõi.

⁶ Ame puãi ndipuka, simunuko. Nda sawiwa lomanu, nda pembuiwa lofeka.

⁷ Vosi va ndete va njola epembe, va mueña lomela, va lipuka puka, vati,

⁸ Wa litumbika ku Yehova, oco Yehova o silamele. Yehova o popele omo wo sanjukila.

⁹ Ove puãi wa njupa vimo lia mai, haive wa mbindikiya eci nda kala kavele a mai.

¹⁰ Tunde kokucitiwa nda kundikiwa kokuove. Ove Suku yange tunde mai a nyita.

¹¹ Ku ka ñale ocipala, momo ohali yi li ocipepi, kuenje ka ku li ukuakuohela.

¹² Olonui via lua via sitika. Olonui via pama via Basiane via ñuala ocingonja.

¹³ Via ngasamela olomela, via soka ndohosi yi punyulula loku koma.

¹⁴ Nda peseka ndovava. Akepa ange osi a fuomoha. Utima wange wa linga ndesela, wa yenguluka vokati kange.

¹⁵ Ongusu yange ya kukuta ndociyo. Elimi liange lia lamelela kolombanjo. Wa ñapa voneketela yokufa.

¹⁶ Momo olombua via ñuala ocingonja. Owiñi wolondingaĩvi wa ñuala. Va noma kovaka lo kolomai.

¹⁷ Nẽla oku tenda akepa ange osi. Va mbanja, va nunguila ovaso.

¹⁸ Va liavela olonanga viange. Uwalo wange vo wimbila ocela.

¹⁹ Puãi ove, a Yehova, ku ka kale ocipãla. Angusu yange, yayulako oku ñuatisa.

²⁰ Popela omuenyo wange kosipata. Mopele kunene wombua.

²¹ Mopele komela wohosi. Ame ndukuakukangisua, mopele kolombinga violonyani.

²² Ame sapula onduko yove ku vakuetu. Hu sivaya pokati kekongelo.

²³ Ene wa sumbi Yehova, u sivayi. Vosi ene wumbuto ya Yakoba, u kemainyi. U yokokeli ene vosi wumbuto ya Isareli.

²⁴ Momo eye ka tombele, ndaño oku nyehula ohali yohukui. Ko wundisilile ocipala, puãi eci a vilikiya wo yeva.

²⁵ Kokuove oko ku tunda esivayo liange vekongelo linene. Nẽlisa olohuminyo viange kovaso ava vo sumbila.

²⁶ Olosuke vi lia kuenje vi kuta. Ava va vanjiliya Yehova vo sivaya. Ovitima viene vi kale lomuenyo ko pui.

²⁷ Asukiyo osi oluali a ivaluka, a pongolokela ku Yehova. Apata osi olofeka a fendela kovaso aye.

²⁸ Momo uviali waco wa Yehova. Eye ombiali yolofeka.

²⁹ Vakuakulituna vo kilu lieve vosi vo petamela. Vosi va enda voneketela vo kekamela, ndaño u ka tẽla oku tumalisa omuenyo waye.

³⁰ Ovitumbulukila viya laviovo viu vumba. Omanu va lombolola Yehova kocitumbulukila locitumbulukila.

³¹ Va sapula ovilinga viaye vieyovo komanu ka va citiwile handi, vati, Yehova wa ci linga.