OLOSAMO 21 - Embimbiliya - Bíblia Sagrada em Umbundu

Kusongui wolonjimbi. Osamo ya Daviti.

¹ Soma o yolela olohõlo viove, a Yehova, o yolela cimue okuyula wo wiha.

² Wo wiha evi via livela utima waye. Kuo limilile eci ca lomba omela yaye.

³ O ñualẽhela laye lasumũlũho ovina viwa. O kapa kutue waye ekolowa liulu wa fina.

⁴ Wa lomba kokuove omuenyo kuenje wo wiha. Wo wiha oloneke via lua vi enda ño-o hũ.

⁵ Ulamba waye u lua omo ove u kuatisa, u wihaiha esumbilo luwale.

⁶ Ocili, ove u sumuluisa cimue oloneke ka vi pui, haive u sanjuisa omo ove muẽle o kala kala laye.

⁷ Omo Soma o kolela Yehova, kuenje, omo o kasi locisola ka ci pui ca Tõlo, oco ka sengiwa.

⁸ Eka liove li sanga ovanyali vove vosi. Eka liove liondio li sanga vosi va ku suvuka.

⁹ Eci o mõleha o va lingisa ndelungulungu. Yehova o va ina lonyeño yaye. Ondalu yi va lia.

¹⁰ O nyõla ombuto yavo kilu lieve. O nyõla ocitumbulukila cavo pokati komãla vomanu.

¹¹ Nda va ku tumbila ehãla lĩvi pamue oku ku tumbika ongombo yĩvi, ka va ci tẽla.

¹² Momo ove o va sandula. Ove muẽle o loñisa ovisongo viove kovipala viavo.

¹³ Votoka a Yehova, longusu yove. Kuenje tu imba ovisungo loku sivaya unene wove.