OLOSAMO 20 - Embimbiliya - Bíblia Sagrada em Umbundu

Kusongui wolonjimbi. Osamo ya Daviti.

¹ Onduko ya Suku ya Yakoba yi ku vindikiye. Yehova a ku tambulule keteke liohali.

² A ku votuile eci ci ku ohela, haico ci tunda vonembele. A ku kolise tunde ko Siono.

³ A ivaluke alembe ove. A tambule ovilumba viove vioku yoka.

⁴ A ku muise evi vi yongola utima wove. A tumbike ocili ahãla osi utima wove.

⁵ Ciye okuti tu yolela okuyula kuove, loku nyanyumula apandela etu vonduko ya Suku yetu. Yehova a ku tẽlisile alombelo ove osi.

⁶ Cilo nda kũlĩha okuti Yehova o silamela ombuavekua yaye. Tunde kilu liaye li kola o yi kumbulula, loku yi muisa okuyula kualua leka liaye liondio.

⁷ Vamue va lipandela akãlu, vakuavo otuvalu, etu puãi tu lipandela onduko ya Yehova, Suku yetu.

⁸ Ovo va yuliwa kuenje va kupuka. Etu puãi tu votoka, tu talama vilu.

⁹ A Yehova, yulisa Soma. Tu tambulule eci tu vilikiya.