OLOSAMO 19 - Embimbiliya - Bíblia Sagrada em Umbundu

Kusongui wolonjimbi. Osamo ya Daviti.

¹ Ilu li sapula ulamba wa Suku. Oluali lu situlula ovilinga viovaka aye.

² Utanya u sapuila utanya. Uteke u longisa uteke uloño.

³ Upopi ka ku li, ndaño elimi. Ondaka yao ka yi yevala.

⁴ Haimo esapulo liao lia pitila kolofeka viosi, olondaka viao kesulilo lioluali luosi. Kokuao wa nyanyumuilako ombalaka yekumbi.

⁵ Olio li linga ndukuandombua o tunda vohondo yaye, liyolela ndonõi yi lupukila oku litunda.

⁶ Okutunda kualio tunde kesukiyo lilu. Okuñuala kualio toke kasulilo alio. Ka ku li eci ci puluka kowuya walio.

⁷ Ovihandeleko via Yehova via sunguluka, vi kavuluisa utima. Uvangi wa Yehova wocili, u muisa olondunge ava va wulua.

⁸ Ovisila via Yehova via sunguluka, vi sanjuisa utima. Ocihandeleko ca Yehova ca pua eko, ci yelisa ovaso.

⁹ Usumba wa Yehova we lipua, wenda ño-o hũ. Olonimbu via Yehova viocili, viesunga muẽle.

¹⁰ Ca sesamela oku vi livela ca piãla, okuti ulu u sule, ndaño ulu wa lua wa fina. Oku sosa via piãla, okuti owiki u sule, ndaño u u loka loka kocingo.

¹¹ Kuenda vali, ukuenje wove o lungowaiwa lavio. Oku vi linga ku kuete onima ya lua.

¹² O tẽla oku limbuka okulueya kuaye helie? Njelise ovina viuyombeki.

¹³ Tateka ukuenje wove kakandu ocipango, ka a ka njike. Oco ndi lipua, kuenje si lueya ca piãla.

¹⁴ Olondaka viomela wange lovisimilo viutima wange vi sunguluke kokuove, a Yehova, wucikolo cange, haive wunjovoli yange.