OLOSAMO 18 - Embimbiliya - Bíblia Sagrada em Umbundu

Kusongui wolonjimbi. Osamo ya Daviti, ukuenje wa Yehova, u wa imbila Yehova olondaka viocisungo eci eteke Yehova wo popela peka liovanyali vaye vosi kuenda peka lia Saulu. Wa imba hati,

¹ A Yehova hu sole. Ove wungusu yange.

² Yehova ewe liange, haeye ocikolo cange, haeye upopeli wange. Eye Suku yange, haeye ewe liange, kokuaye oko mbunda. Eye otevele yange, haeye ombinga yeyovo liange, haeye ombonge yange.

³ Mbilikiya Yehova, u wa posokela esivayo, kuenje mopelua kovanyali vange.

⁴ Ovikolo viokufa via ñuala. Andunde evĩho a ndingisa usumba.

⁵ Ovikolo vionjembo via nanga. Olonjanjo viokufa via misukila.

⁶ Eci nda sakalala nda vilikiya Yehova, nda litetelela ku Suku yange. Vonembele yaye wa yeva ondaka yange. Okulitetela kuange kua yevala kokuaye.

⁷ Oco, ongongo ya lisenga, ya tingoka. Oviseveto violomunda laviovo via luluma, via lisenga omo eye wa tema.

⁸ Kovanyulu aye kua tunda owisi Komela yaye kua tunda ondalu ya lia. Olosase vi taima via tunda kokuaye.

⁹ Wa petamisavo ilu, wa loka. Owelema wosi wa kala vemehi liolomai viaye.

¹⁰ Wa endela kukeruvi, wa palala. Wa endela kavava ofela, kuenje wa pita lonjanga.

¹¹ Owelema owo a lingisa ociwundilo caye. Alende anene, hao a tekava, e yuka ovava, o-o a linga ombalaka yaye.

¹² Kocinyi ca kala kovaso aye oko kua tunda ociwe lakãla ondalu.

¹³ Yehova kilu wa lemila. Tõlo wa imba ondaka yaye yokuti ociwe lakãla ondalu.

¹⁴ Wa imba ovisongo viaye kuenje wa va sandula. Wa tuma oviliakulo kuenje wa va sakalaisa.

¹⁵ Oco posi yovava pa moleha. Oviseveto violuali via vembulukila okulemela kuove, a Yehova, lofela yoku fuima kuanyulu ove.

¹⁶ Tunde kilu wa ngoluila ovaka kuenje wa nambula, wa njupa vovava a lua.

¹⁷ Wa mopela kunyãli wange wa pama. Wa mopela kuava va suvuka, momo va miãla kongusu.

¹⁸ Va mbuila veteke liohali yange, Yehova puãi wa ndingila onjaka.

¹⁹ Wa mitisa oku kunene. Wa mopela omo a sanjukila.

²⁰ Yehova wa muisa ndesunga liange. Wa niuwila ndokuyela kuovaka ange.

²¹ Momo nda endaila volonjila via Yehova, sia lueyele loku tunda ku Suku yange.

²² Olombilo viaye viosi nda vi imba ovaso, sia sile ovihandeleko viaye.

²³ Ame nda pua eko kovaso aye. Nda litata okuti si sangi ongole.

²⁴ Oco Yehova a muisila ndesunga liange, ndokuyela kuovaka ange kovaso aye.

²⁵ Ku vakuahenda ove o lilekisa okuti ukuahenda. Ku wa pua eko o lilekisa okuti wa pua eko.

²⁶ Ku wa yela o lilekisa okuti wa yela. Ku wa puiya o lilekisa okuti wa puiya.

²⁷ Momo o popela ava va liketisa, ava va lituna puãi, o va sepula.

²⁸ Haimo o miha ovela yange. Yehova Suku yange o mihila owelema wange.

²⁹ Momo nda ñasi love nẽla oku yula ohoka. Nda ñasi la Suku yange nẽla oku somboka ocimbaka.

³⁰ Suku yaco, ovilinga viaye via pua eko. Ohuminyo ya Yehova yi popoloka. Eye otevele yava vosi va wunda kokuaye.

³¹ Elie Suku nda ha Yehovako? Elie ewe nda ha Suku yetuko?

³² Eye Suku wa njitika lolohõlo, haeye wa sunguluisa onjila yange.

³³ Wa sokisa olomai viange levi viohoha. Wa numbika kuna kua lepa.

³⁴ Eye ikisa ovaka ange oku yaka, okuti ovoko ange a tẽla oku lumbikila ohonji yosipi.

³⁵ Wa nyihavo otevele yeyovo liove. Eka liove liondio lia ñolisa. Okuomboka kuove kua nyiha unene.

³⁶ Wa sanjavaisa apa pa liatela olomai viange. Olomai viange ka via sieluhile.

³⁷ Nda landula ovanyali vange kuenje nda va sanga. Sia tiukileko te va kunduiwa.

³⁸ Nda va toma olusole okuti ka va tẽlele oku katuka vali. Va kupukila vemehi liolomai viange.

³⁹ Momo wa malehisila ocilunga longusu. Wa metamisila ava va ñatukila.

⁴⁰ Ovanyali vange wa va imbisa kokuange olonyima. Ava va suvuka nda va nyõla.

⁴¹ Va vilikiya, puãi ka kua kaile u o va popela. Va vilikiya Yehova, eye puãi ka va tambuluile.

⁴² Nda va sula toke va linga ndoneketela kovaso ofela. Nda va inasi ndonata yovoluwa.

⁴³ Ove wa mopela kovama omanu. Wa ndingisa utue wolofeka. Ofeka sia kũlĩhile ya mbumba.

⁴⁴ Tuli va njeva haico va pokola kokuange. Vakualofeka va sambela.

⁴⁵ Vakualofeka va senguluka. Va tunda kovikolo viavo loku luluma.

⁴⁶ Yehova o kasi lomuenyo. Ewe liange li pandiyiwe. Va kemainye Suku yeyovo liange.

⁴⁷ Eye Suku wa fetuluinyailako, haeye wa mokuisila olofeka.

⁴⁸ Wa mopela kovanyali vange. Wa nulika kilu liava va ñatukila. Wa mopela koloñangisi.

⁴⁹ Oco hu panduila, a Yehova, pokati kolofeka. Njimbila onduko yove ovisungo viesivayo.

⁵⁰ O muisa osoma yaye okuyula kualua. O sola ombuavekua yaye, Daviti, locisola ka ci pui. Eye lombuto yaye o va sola oloneke vi enda ño-o hũ, ka vi pui.