OLOSAMO 17 - Embimbiliya - Bíblia Sagrada em Umbundu

Elombelo lia Daviti.

¹ A Yehova, yeva ondaka yesunga, tava kevilikiyo liange. Vonguila etui kokulikutilila kuange, haiko ku tunda komela wa pua elimbi.

² Okuyovoka kuange ku tunde kokuove. Ovaso ove a limbuke eci cesunga.

³ Nda o nyika utima wange, nda o seteka vuteke, pamue nda o ñulĩhisa, kokuange ku sangiko evĩho. Vomela wange ka mu tunda tunda uhembi.

⁴ Kondaka yovilinga viomanu, omo nda pokola kondaka yomela wove, nda yuvula olonjila viocinyõi.

⁵ Nda endela lika volonjila viove. Olomai viange ka via sieluhile.

⁶ A Suku, hu vilikiya momo o nambulula. Mbonguile etui liove, yeva olondaka viange.

⁷ Opopeli wava va tila ava va va katukila, ha va wundi peka liove liondio, lekisa ocisola cove ka ci pui okuti va ci komõha.

⁸ Nate ndomõla iso. Mbundise vundembo wavava ove.

⁹ Mbundisile kolondingaĩvi vi nalisa ohali, haivo ovanyali va ñuala, kuenje va sanda oku njipa.

¹⁰ Va sitika ovitima viavo okuti ohenda ka yi sangimo omangu. Kovimela viavo ku tunda oku lituna.

¹¹ Va ndandula, va ñuala ocingonja. Va noña oku ñupuila posi.

¹² Va linga ndohosi ya sunja oku suyulula, ndeyove liohosi li lavekela vonutula.

¹³ Votoka, a Yehova. Lisuñama lavo. Va kupula. Omuenyo wange u silamela kolondingaĩvi losipata yove.

¹⁴ U silamela komanu leka liove, a Yehova, okuti komanu ava, onepa yavo yomuenyo ulo oku salala lika. Ve kute kute leci wa va selekela. Omãla vavo ve kute kuenje ku va supile. Va kale locisupe va sila oloñaña viavo.

¹⁵ Ame puãi, mola ocipala cove lesunga. Eci masuka kuenje hu mõla ndomo o kasi, nela.