OLOSAMO 148 - Embimbiliya - Bíblia Sagrada em Umbundu

¹ Sivayi Yehova. Sivayaili Yehova kovailu. U sivayaili kuosi kua yeluka.

² U sivayi, ene avangelo vaye. U sivayi, ene alohoka viaye.

³ U sivayi, ene akumbi losãi. U sivayi, vosi ene alombungululu viocinyi.

⁴ U sivayi, ene availu ovailu, lenevo, avava okilu lilu.

⁵ Vi sivaye onduko ya Yehova, momo wa handeleka kuenje via lulikiwa.

⁶ Wa vi tungila olumue. Wa vi kapela ovililo ka vi pitahãliwa.

⁷ Sivayaili Yehova kilu lieve: Ene avimuandu, lene alondo osi,

⁸ Andalu, aciwe, acikokoto, ambundu, afela yekungukungu, wukuaku pokola kocihandeleko caye.

⁹ Alomunda, awulu osi, aviti viepako, aviti viosi violo-cedro,

¹⁰ Avinyama, alongombe, apuka akuakuyaila, alonjila vi palala,

¹¹ alosoma viokilu lieve, alofeka viosi, alombuale, alonganji viosi viokilu lieve,

¹² akuenje, afeko, alosekulu, amãla,—

¹³ Vosi sivayi onduko ya Yehova, momo onduko yaye oyo lika ya kemãla. Ulamba waye wa tulamela ongongo lilu.

¹⁴ Eye wa petuila omanu vaye ombinga. O sivayiwa lolosandu viaye viosi, ovio va Isareli va kasi ocipepi laye. Sivayi Yehova.