OLOSAMO 147 - Embimbiliya - Bíblia Sagrada em Umbundu

¹ Sivayi Yehova. Momo Suku yetu ukuahenda kuenje oku wimbila ovisungo viesivayo oco ciwa, haico ca sesamela.

² Yehova o tumbulula Yerusalãi, haeye ongolola va Isareli va takumũha.

³ O sakola ava va teka kovitima, kuenje itika apute avo.

⁴ Eye o tenda olombungululu viosi. Viosi o vi tukula olonduko viavio.

⁵ Cime cetu unene, olohõlo viaye via lua cimue. Ovina viosi viu lomboloka.

⁶ Yehova o votola ava va kangisua, olondingaĩvi o vi kupuila posi.

⁷ Imbili Yehova lolupandu. Imbili Suku yetu ovisungo viesivayo lohalupa.

⁸ Eye o sitika ilu lalende. Eye angiliyila ongongo ombela. O yundisa owangu kolomunda.

⁹ Ecaeca kovinyama okulia kuavio komãla vovikuamanga nda va lila.

¹⁰ Eye ka yolela ongusu yokavalu, ka sanjukila ovolu ulume.

¹¹ Yehova o sanjukila ava vo sumbila, ava va imba ovaso ocisola caye ka ci pui.

¹² Sivaya Yehova, ove a Yerusalãi! Sivaya Suku yove, a Siono!

¹³ Momo o kolisa olomimbiliko violombundi viove, o sumũlũisa omãla vove vovokati kove.

¹⁴ O ku ñualisa lovikanjo vi kasi lombembua. O ku kutisa lotiliku ya fina.

¹⁵ O tuma ocihandeleko caye kilu lieve. Ondaka yaye yenda lonjanga yalua.

¹⁶ O lokisa neve ndovonya omeme. O waya ocikokoto ndetiko.

¹⁷ O lokisa ociwe caye ndolosisi. Helie o talama lombambi yaye?

¹⁸ O tuma ondaka yaye, o vi yengulula. O sikisa ofela yaye kuenje ovava a enda.

¹⁹ O sapuila Yakoba ondaka yaye. O lombolola ku Isareli ovisila viaye lovihõlo viaye.

²⁰ Layimue vali ofeka a linga ndoco. Layimue vali ofeka ya kũlĩha ovihõlo viaye. Sivayi Yehova.