OLOSAMO 145 - Embimbiliya - Bíblia Sagrada em Umbundu

Ocisungo cesivayo ca sovuiwa la Daviti.

¹ Hu kemainya, a Suku yange, a Soma yange. Manduila onduko yove oloneke viosi.

² Oloneke viosi hu panduila. Sivaya ño-o hũ onduko yove.

³ Yehova unene, wa posokela enene esivayo. Unene waye ka u kũlĩhisua.

⁴ Ocitumbulukila ci sivaya ovopange ove kocitumbulukila cikuavo. Va lombolola ovilinga viove violohõlo.

⁵ Ulamba wa piãla wuviali wove, lovilinga viove vi komohĩsa, ovio sinyanyẽha.

⁶ Omanu va sapula unene wovilinga viove vi yokokisa. Lame ndombolola okukemãla kuove.

⁷ Va tukula oluhimo lunu wove wa lua kuenje va imbila esunga liove ovisungo.

⁸ Yehova ukuacali, o kasi lohenda, o livala konyeño. Ocisola caye ka ci pui ca lua cimue.

⁹ Yehova o lingila vosi ohenda. Ocisola caye ci kasi koviluvo viaye viosi.

¹⁰ Oviluvo viove viosi vi ku pandula, a Yehova. Olosandu viove vi ku pandiya.

¹¹ Va vangula ulamba wuviali wove, loku sapula unene wove,

¹² okuti va limbukisa omãla vomanu ovili nga viunene wove, lulamba weposo liuviali wove.

¹³ Uviali wove uviali ko pui. Okutulamela kuove ku kala kovitumbulukila viosi. Yehova ukuacili kolondaka viaye viosi, haeye ukuahenda kovilinga viaye viosi

¹⁴ Yehova o yakela vosi va yongola oku kupuka. O petula vosi va petama.

¹⁵ Vosi va ku imba ovaso, kuenje o va avela okulia kuvo waco.

¹⁶ O nyanyumula eka liove, kuenje o kutisa viosi vi kasi lomuenyo.

¹⁷ Yehova ukuesunga kovituwa viaye viosi, haeye ukuahenda kovilinga viaye viosi.

¹⁸ Yehova o kasi ocipepi la vosi vo vilikiya, okuti vo vilikiya ocili.

¹⁹ O muisa vosi vo sumbila evi va yongola. O yeva uteto wavo, o va popela.

²⁰ Yehova o silamela vosi vo sole, olondingaĩvi puãi, o vi nyõla.

²¹ Omela wange u sapula esivayo lia Yehova. Vosi vakuetimba va pandole ño-o hũ onduko yaye yi kola.