OLOSAMO 144 - Embimbiliya - Bíblia Sagrada em Umbundu

Osamo ya Daviti.

¹ Yehova, eye ewe liange, a sivayiwe. O longisa ovaka ange ovita, lovimuĩni viange oku yaka.

² Eye ewe liange, haeye ocikolo cange. Eye ombonge yange, haeye upopeli wange. Eye ombindikiyo yange, kokuaye oko nda wunda. O njulisa olofeka okuti vi mbumba.

³ A Yehova, omunu hẽ nye okuti o wivaluka, pamue omõla omunu okuti u sokolola?

⁴ Omunu wa lisoka lofela yaño. Oloneke viaye via linga ndocilelembia ci pita.

⁵ Petamisa ilu liove, a Yehova, loka. Lamba olomunda okuti ku tunda owisi.

⁶ Liakuisa olomanyula, va sandola. Imba ovisongo viove, va lundula.

⁷ Kilu o kasi, olola eka liove. Mopele. Njupe vovava anene lo povaka a vakualofeka.

⁸ Olomela viavo vi limbaika, lovaka avo olondio ovaka uhembi.

⁹ A Suku, hu imbila ocisungo cokaliye. Hu imbila ovisungo viesivayo losateriu yi kuete ekui liovikolo.

¹⁰ Ove o muisa olosoma eyulo, haive o popela ukuenje wove Daviti.

¹¹ Muluise kosipata yĩvi. Mopele povaka a vakualofeka. Ovimela viavo vi popia uhembi, lovaka avo olondio ovaka uhembi.

¹² Omãla vetu valume vutila wavo va linge ndovikũla via kula ciwa. Lomãla vetu vakãi va linge ndovawe avindi a songiwila onjo yosoma.

¹³ Olosila vietu vi yuke olomema viovaima osi. Olomeme vietu vi citile kovisenge vietu olohũlũkãi lolohũlũwa.

¹⁴ Olongombe vietu vi mine mine ciwa. Ka vi ka pulumũle ndaño oku cita ovife. Volokololo vietu ka mu ka yevale oku litetelela ohali.

¹⁵ Ava va kasi ndoco va sumũlũha. Ofeka yokuti, Yehova eye Suku yavo, oyo ya sumũlũha ocili.