OLOSAMO 143 - Embimbiliya - Bíblia Sagrada em Umbundu

Osamo ya Daviti.

¹ Yeva ohutililo yange, a Yehova. Vonguila etui kalombelo ange. Omo o kasi lesunga locili, nambulule.

² Ku ka tuale ukuenje wove vekanga, momo kovaso ove ka kuli u o kasi lomuenyo wa lipua.

³ Omo unyali wa suvalisa, kuenje wa kupuila omuenyo wange posi, wa numalisa vowelema ndava va fa ale osimbu,

⁴ oco espiritu liange ka li kuete vali ongusu, lutima vokati kange u kasi lupongo.

⁵ Njivaluka oloneke vionahũlu. Sokolola ovilinga viove viosi. Sinyanyẽha upange wovaka ove.

⁶ Ngoluila kokuove ovaka. Utima wange u ku kuetele enyona ndeli liofeka yekango.

⁷ A Yehova, yayulako oku nambulula. Espiritu liange li kasi oku konyõha. Ku ka mbundisile ocipala cove sanga ndinga ndava va lokila vonjembo.

⁸ Omele njukise ocisola cove ka ci pui, momo nda ku kolela. Njimbe onumbi yonjila nda posokela oku endelamo, momo nda tiamisa utima wange kokuove

⁹ Mopele, a Yehova, kovanyali vange. Nda tilila kokuove okuti mbunda.

¹⁰ Ndongise oku linga ocipango cove momo ove Suku yange. Espiritu liove liwa lisonguile vonjila ya tapika.

¹¹ A Yehova, popela omuenyo wange mekonda lionduko yove. Omo o kasi lesunga, vohali ñasi, njupemo.

¹² Omo o kasi locisola ka ci pui, kundula ovanyali vange loku nyõla vosi va suvalisa. Momo ndukuenje wove.