OLOSAMO 140 - Embimbiliya - Bíblia Sagrada em Umbundu

Kusongui wolonjimbi. Osamo ya Daviti.

¹ Mopele, a Yehova, komanu vãvi. Silamele koloñangisi

² vi tumba tumba ahãla ãvi vitima viavo, haivio vi sovola ño-o ovita.

³ Va lepika alimi avo ndolonyõha. Owule wombuta u li volomela viavo.

⁴ Mopele, a Yehova, povaka olondingaĩvi. Silamele koloñangisi vi kapela ovitima koku ñonjola olomai.

⁵ Vakuepela va nela onjanjo. Va yala ovikolo ndowanda. Va ñapela ulivi konele yonjila.

⁶ Nda popia la Yehova siti, Ove Suku yange. Vonguila etui kokulikutilila kuange, a Yehova.

⁷ A Yehova, a Suku yange, opopeli wange wa pama, ove wa vindikiya utue wange eteke liocilunga.

⁸ A Yehova, ku ka ece kondingaĩvi evi a yongola. Ku ka tave okuti olongombo viayo vĩvi vi amako.

⁹ Ava va mungika va lituna. Va nyõlehe lumamohe u tunda volomela viavo.

¹⁰ Akãla ondalu a va lokele. Va imbiwe vovitunu omu ka va tundi vali.

¹¹ Ukualundi ka ka tunge vofeka! Evĩho li landule oñangisi loku yi veta veta.

¹² Nda kũlĩha okuti Yehova oñuatisi yava va kangisua, haeye o tetuluila olohukui lesunga.

¹³ Ocili, ukuesunga o pandula onduko yove. Ava va sunguluka va kala hũ kovaso ove.