OLOSAMO 139 - Embimbiliya - Bíblia Sagrada em Umbundu

Kusongui wolonjimbi. Osamo ya Daviti.

¹ A Yehova, ove wa ñulĩhisa, wa ñuliha muẽle.

² Wa ñuliha poku tumãla lo poku votoka. Wa limbuka ovisimilo viange tunde kupãla.

³ Wa ndengusula kolonjila viange lo poku pekela. Ovituwa viange viosi wa vi limbuka.

⁴ Ka ku li ondaka kelimi liange te ove, a Yehova, wa yi kũlĩha yosi.

⁵ Wa sitika kovaso lo konyima. Wa ñapa eka liove.

⁶ Okukũlĩha kuaco kua ñomohisa. Kua miãla, siu ku tẽla.

⁷ Ngenda pi si yuvula Espiritu liove? Nilila pi apa ove ku kasi?

⁸ Nda ndonda kilu, haiko o kasi. Nda njala ula vonjembo, haimo o kasi.

⁹ Nda nyañula avava omele si tungi kesukiyo liokalunga,

¹⁰ ndaño oko eka liove li songuila, haiko eka liove liondio li ñuata.

¹¹ Nda ndinga siti, Owelema u nuvike. Ocinyi ñasi laco ci linge nduteke,—

¹² ndaño owelema kokuove hawelemako. Uteke wa tua ndutanya. Owelema locinyei via lisoka.

¹³ Ovimatamata viange viovokati ove wa vi lulika. Wa ndulika vimo lia mai.

¹⁴ Hu sivayaila ocikomo como wa ndulika. Ovopange ove a komohisa. Ove wa kũlĩha pe utima wange.

¹⁵ Akepa ange ka a wundile kokuove cina nda lulikiwa vuyombeki, cina nda tungiwa luloño kosi yongongo.

¹⁶ Ovaso ove a ndete eci ovimatamata vietimba liange ka via lulikiwile handi. Velivulu liove oloneke viosi via nukuiwila omo via sonehiwa osimbu ka viko handi.

¹⁷ A Suku, ovisimilo viove ndi vi sole ca lua. Oku vi tenda via lua muẽle.

¹⁸ Nda ndi vi tenda, via lua, eseke li sule. Eci masuka, haimo ñasi love.

¹⁹ A Suku, ciwa nda wipa olondingaĩvi, ciwa nda vakuakupesela osonde va nunda.

²⁰ Momo va ku popia ci kola. Ovanyali vove va tukula onduko yove lesanda.

²¹ Si suvuka he, a Yehova, ava va ku suvuka? Si nyehula he, ava va tamalala love?

²² Nda va suvuka enene, va linga ovanyali vange.

²³ Ñulĩhise, a Suku. Kũlĩha utima wange. Seteke. Kũlĩha ovisimilo viange,

²⁴ hu vanji nda ñasi lovituwa vievĩho. Songuile vonjila ka yi pui.