OLOSAMO 136 - Embimbiliya - Bíblia Sagrada em Umbundu

¹ Panduli Yehova, momo uwa, momo ohenda yaye ka yi pui.

² Panduli Suku yolosuku, momo ohenda yaye ka yi pui.

³ Panduli Ñala yoloñala, momo ohenda yaye ka yi pui.

⁴ U o lingainga ovikomo vinene lika waye, momo ohenda yaye ka yi pui.

⁵ U wa lulika ilu lolondunge viaye, momo ohenda yaye ka yi pui.

⁶ U'wa yala ongongo kilu liovava, momo ohenda yaye ka yi pui.

⁷ U wa lulika ovinyi vinene, momo ohenda yaye ka yi pui.

⁸ Ekumbi ha li viala kutanya, momo ohenda yaye ka yi pui.

⁹ Osãi lolombungululu ha vi viala kuteke, momo ohenda yaye ka yi pui.

¹⁰ U wa kundula olonuñulu via va Egito, momo ohenda yaye ka yi pui.

¹¹ Wa tundisa Isareli pokati kavo, momo ohenda yaye ka yi pui,

¹² leka lia pama, lokuokuo kuoloha, momo ohenda yaye ka yi pui.

¹³ U wa tepa pokati o Kalunga Kakusuka, momo ohenda yaye ka yi pui.

¹⁴ Yu wa pitisa Isareli vokati kaco, momo ohenda yaye ka yi pui.

¹⁵ Wa kupikila puãi Fareo lolohoka viaye vo Kalunga Kakusuka, momo ohenda yaye ka yi pui.

¹⁶ U wa songuila omanu vaye vekalasoko, momo ohenda yaye ka yi pui.

¹⁷ U wa kundula olosoma vinene, momo ohenda yaye ka yi pui.

¹⁸ Wa ipa olosoma via kemala, momo ohenda yaye ka yi pui.

¹⁹ Siyoni, Soma ya va Amori, momo ohenda yaye ka yi pui.

²⁰ La Oge, Soma ya Basiane, momo ohenda yaye ka yi pui.

²¹ Wa eca ovisenge viavo ndocipiñalo, momo ohenda yaye ka yi pui.

²² Oco ocipiñalo ca Isareli ukuenje waye, momo ohenda yaye ka yi pui.

²³ Wa tu ivaluka kukukui wetu, momo ohenda yaye ka yi pui.

²⁴ Wa tu popela kovanyali vetu, momo ohenda yaye ka yi pui.

²⁵ Ecaeca okulia ku vosi vakuetimba, momo ohenda yaye ka yi pui.

²⁶ Panduli Suku ukuailu, momo ohenda yaye ka yi pui.