OLOSAMO 135 - Embimbiliya - Bíblia Sagrada em Umbundu

¹ Sivayi Yehova. Sivayi onduko ya Yehova. U sivayi, ene akuenje va Yehova.

² Ene wakuakutalama vonjo ya Yehova, vovitali vionjo ya Suku yetu,

³ sivayi Yehova, momo Yehova uwa. Imbili onduko yaye ovisungo momo eye ukuacali.

⁴ Ocili, Yehova wa linolela Yakoba, Isareli ha lingi waye muẽle.

⁵ Momo nda kũlĩha okuti Yehova unene. Cime cetu wa piãla olosuku viosi.

⁶ Yehova cosi a panga haico a linga, kilu lo posi, vokalunga lo valondo osi.

⁷ O londaisa ombundu kasukiyo ongongo. O sokiyila ombela oviliakulo. Upopa ofela vatambo aye.

⁸ Wa kundula olonuñulu via Egito, levi viomanu levi viovinyama.

⁹ Wa tuma olondimbukiso lovikomo vokati kove, a Egito, ku Fareo lo kovakuenje vaye vosi.

¹⁰ Wa kundula olofeka via lua, kuenje wa ipa olosoma vinene.

¹¹ Siyoni, Soma ya va Amori, Oge, Soma ya Basiane, lovosoma osi a Kanana.

¹² Kuenje wa eca ovisenge viavio ndocipiñalo. Oco ocipiñalo ca va Isareli, omanu vaye.

¹³ Onduko yove, a Yehova, ka yi pui. A Yehova, onduko yove ya kemãla kovapata osi.

¹⁴ Momo Yehova o tetela omanu vaye onimbu yoku va yovuisa kuenje o lingila akuenje vaye ohenda.

¹⁵ Oviteka violofeka opalata lulu, ovilulikilo viovaka omanu.

¹⁶ Vi kasi lolomela, puãi ka vi popi. Vi kasi lovaso, puãi ka vi lete.

¹⁷ Vi kasi lovatui, puãi ka vi yevite. Ka mu li ofela volomela viavio.

¹⁸ Ava va vi lulika, kuenda vosi va vi kolela, va lisoke lavio!

¹⁹ Ene anjo ya Isareli, sivayi Yehova. Ene anjo ya Arone, sivayi Yehova.

²⁰ Ene anjo ya Lewi, sivayi Yehova. Ene wakuakusumbila Yehova, sivayi Yehova.

²¹ Yehova a sivayiwile vo Siono. Eye wa tunga vo Yerusalãi. Sivayi Yehova.