OLOSAMO 132 - Embimbiliya - Bíblia Sagrada em Umbundu

Ocisungo colongende.

¹ A Yehova, ivalukila Daviti ohali yosi a tala.

² Ndomo a lisinga la Yehova, kuenje wa likuminya lu o kola wa Yakoba,

³ hati, Si iñila vonjo yange, ndaño oku wila pula wange,

⁴ Si tava okuti ovaso ange a mõla otulo, pamue ovisokopia viange vi pata,

⁵ te tete sangela Yehova ocitumãlo, te sanga muẽle ocitumãlo omo mu kala Ukuonene wa Yakoba.

⁶ Ocikasia covisila tua ci yevela ve Efarata. Tua ci sanga vovapia a Yeari.

⁷ Tu endi kocitumãlo caco. Tu fendeli kociliatelo caye.

⁸ Votoka, a Yehova, iñila vocipuyukilo cove, ove locikasia cunene wove.

⁹ Ovitunda viove vi paleke esunga. Olosandu viove vi ulule lonjolela.

¹⁰ Mekonda liukuenje wove Daviti ku ka tiule ocipala combuavekua yove.

¹¹ Yehova wa lisinga la Daviti esingo liocili, kuenje ka tiukamo, hati, Ñapa kocalo cove umue pomãla vove wa cita.

¹² Nda omãla vove va pokola kocisila cange kuenda kovihandeleko viange ndi va longisa, oco omãla vavo lavovo va tumãla kocalo cove oloneke vi enda no-o hũ, ka vi pui.

¹³ Momo Yehova wa nola Siono. Wa li yonguila ocitungilo caye,

¹⁴ hati, Cilo oco ocipuyukilo cange oloneke ka vi pui. Kulo oko nunga, momo nda yongolako.

¹⁵ Nduisa cocili ovaima alio. Ñutisa olosuke vialio lombolo.

¹⁶ Ovitunda vialio ndi vi walisa eyovo. Olosandu vialio vi ulula lonjolela.

¹⁷ Oko muẽle njovisila ombinga ya Daviti. Nda pongiyila ombuavekua yange ovela.

¹⁸ Ovanyali vaye ndi va walisa osõi, kokuaye puãi ekolowa liaye li nina.