OLOSAMO 124 - Embimbiliya - Bíblia Sagrada em Umbundu

Ocisungo colongende, ca sonehiwa la Daviti.

¹ Yehova nda ka kaile konele yetu,— Isareli a popie hati,

² Yehova nda ka kaile konele yetu, cina omanu va tu katukilile,

³ nda va tu ina lomuenyo cina onyeño yavo ya tu wengukilile,

⁴ lendunde nda lia tu ambata, kuenda olui lue yuka nda lua tu tuvika,

⁵ okuti akimba a tema nda a tu vombisa.

⁶ Yehova a sivayiwe, U ka tu ecele kovayo avo ndohuta.

⁷ Tua puluka ndonjila vonjanjo ya vakuanjila. Onjanjo ya tepa, etu tua puluka.

⁸ Okuohelua kuetu ku kasi vonduko ya Yehova, U wa lulika ilu longongo.