OLOSAMO 122 - Embimbiliya - Bíblia Sagrada em Umbundu

Ocisungo colongende ca sonehiwa la Daviti.

¹ Nda yolela eci va popia lame vati, Tu endi konjo ya Yehova.

² A Yerusalãi, olomai vietu vi tai volombundi viove.

³ Wa tungiwa, a Yerusalãi, ndimbo lia likongela kumosi.

⁴ Oko ku lamayana apata, o-o apata a Yehova. Oco ocihõlo ca va Isareli, coku panduila onduko ya Yehova.

⁵ Momo oko kua tumbikiwa ovialo viekanga, ovialo vionjo ya Daviti.

⁶ Likutilili ombembua ya Yerusalãi. Ava va ku sole va sumũlũhe.

⁷ Ku kale ombembua Vokati kovimbaka viove, lesumũlũho vayemba ove.

⁸ Mekonda lia vamanjange la vakuetu mopia siti. Ombembua yi kale vokati kove.

⁹ Mekonda lionjo ya Yehova Suku yetu sandiliya esumũlũho liove.