OLOSAMO 119 - Embimbiliya - Bíblia Sagrada em Umbundu

¹ Ava va endela vonjila ya suñama, okuti vonjila yovihandeleko via Yehova, ovo va sumũlũha.

² Ava va linga ovisila viaye, loku u vanjiliya lutima wavo wosi,

³ haivo ka va lingi evĩho, puãi va endela volonjila viaye, ovo va sumũlũha.

⁴ Wa tu handeleka okuti ovihandeleko viove tu vi linga lombili.

⁵ Ndi livela ca lua okuti olonjila viange vi loña koku linga ovisila viove.

⁶ Momo, si kutiwa osõi, nda ndi sumbila ovihandeleko viove viosi.

⁷ Hu pandula lutima wa sunguluka eci ndi lilongisa olonimbu viove viesunga,

⁸ ha si lingi ovisila viove. Ku ka njanduluke.

⁹ Ukuenje o tẽla ndati oku tata onjila yaye okuti yi yela? O ci tẽla poku lilava ndeci ca popia ondaka yove.

¹⁰ Nda ku sandiliya lutima wosi. Ku ka tave okuti mambuka vonjila yovihandeleko viove.

¹¹ Nda soleka ondaka yove vutima okuti siu ku sinila.

¹² A Yehova, ove wa sesamela esivayo. Ndongise ovisila viove.

¹³ Lomela wange ndi sapula ovihõlo viosi viomela wove.

¹⁴ Nda yolela onjila yovisila viove ndoku yolela ukuasi wosi.

¹⁵ Sokolola alungulo ove. Sumbila olonjila viove.

¹⁶ Sanjukila ovisila viove. Si ivalako ondaka yove.

¹⁷ Linga ciwa ukuenje wove, okuti ñala lomuenyo kuenje mokola kondaka yove.

¹⁸ Patulula ovaso ange okuti ndimbuka ovikomo viovihandeleko viove.

¹⁹ Kilu lieve ndukombe. Ku ka mbundisile ovihandeleko viove.

²⁰ Utima wange u teka longeva yovihõlo viove oloneke viosi.

²¹ Ove o lemela vakuemande, ava va siñaliwa, haivo va tunda kovihandeleko viove.

²² Njupe efuki liavo lepembe, momo nda linga ovisila viove.

²³ Ndaño olosoma vi tumãla loku numbila ahãla, haimo ukuenje wove o sokolola ovisila viove.

²⁴ Ovisila viove ovio esanju liange, haivio olondunguli viange.

²⁵ Utima wange wa petamela posi. Numbulule ndondaka yove.

²⁶ Eci nda lombolola olonjila viange ove wa nambulula. Ndongise ovisila viove.

²⁷ Ndomboluile alungulo ove ndomo a kasi, kuenje sokolola ovikomo viove.

²⁸ Utima wange wa yenguluka lesumuo. Ñolise ndondaka yove.

²⁹ Mambuise vonjila yoku kemba. Ndinge ohenda oku ndongisa ovihandeleko viove.

³⁰ Nda nola onjila yocili. Nda likapela oku tẽlisa ovihõlo viove.

³¹ Nda lamelela ovisila viove. A Yehova, ku ka tave okuti ñutisua osõi.

³² Ndupukila vonjila yovihandeleko viove eci o yanjisa uvanga wange.

³³ A Yehova, njimbe onumbi yoku linga ovisila viove kuenje ngendelamo toke kefulilo.

³⁴ Nyihe olondunge oco mokole kovihandeleko viove, loku vi tata lutima wosi.

³⁵ Ngendise vonjila yovihandeleko viove, momo nda vi sanjukila.

³⁶ Tiamisa utima wange kovisila viove, kocipululu hakoko.

³⁷ Tiula ovaso ange, ka a ka talukile evi viesanda. Nyihe omuenyo volonjila viove.

³⁸ Tẽlisa ohuminyo wa likuminya lukuenje wove, haiyo yi tiama kuava va ku sumbila.

³⁹ Tiula efuki li njokokisa, momo ovihõlo viove ovio viwa.

⁴⁰ Ocili, nda livela alungulo ove. Nyihe omuenyo omo o kasi lesunga.

⁴¹ Ocisola cove ka ci pui ciye kokuange, a Yehova, eyovo liove laliovo, ndohuminyo yove.

⁴² Momo, nda viya, ñala leci nambulula laco ava va fukĩlisa, omo ñolela ondaka yove.

⁴³ Ondaka yocili ku ka yi upe vomela wange, momo elavoko liange li kasi kovihõlo viove.

⁴⁴ Mokoyola kovihandeleko viove oloneke ka vi pui.

⁴⁵ Ngendaenda ndeci manga, momo nda tekela kalungulo ove.

⁴⁶ Ndombololavo kolosoma ovisila viove kuenje si kutisua osõi,

⁴⁷ momo sole ovihandeleko viove, kuenje ndi vi sanjukila.

⁴⁸ Sole muẽle ovihandeleko viove loku vi sumbila. Sinyanyeha ovisila viove.

⁴⁹ Ivaluka ondaka wa popia lukuenje wove, momo ya ñokela oku lavoka.

⁵⁰ Elembeleko liange kotembo yohali, lieli, Ohuminyo yove yi nyiha omuenyo.

⁵¹ Vakuakulituna va njola epembe, ame puãi, si pambuka kocihandeleko cove.

⁵² Eci njivaluka ovihõlo viove vionahulu, ndembelekiwa, a Yehova.

⁵³ Onyeño ya tokota yi ñuete omo olondingaĩvi via yanduluka ondaka yove.

⁵⁴ Ovisila viove ovio ovisungo viange vonjo yungende wange.

⁵⁵ A Yehova, njivaluka onduko yove pokati kuteke. Mokola kovihandeleko viove.

⁵⁶ Esumũlũho ñasi lalio lieli, okuti, Ndukuakupokola kalungulo ove.

⁵⁷ Yehova onepa yange. Nda likuminya siti, Mokola kolondaka viove.

⁵⁸ Nda ku livondela lutima wange wosi, siti, Ñuatise. Ndinge ohenda ndeci wa likuminya.

⁵⁹ Eci sokolola olonjila viange, niamisa olomai viange kovisila viove.

⁶⁰ Njayulako, si tutuvala oku pokola kovihandeleko viove.

⁶¹ Ndaño ovikolo violondingaĩvi vi ñuta haimo si ivala ovihandeleko viove.

⁶² Vokati kuteke masuka oku ku sivaya, omo ovihõlo viove viesunga.

⁶³ Ndikamba lia vosi va ku sumba, lava va pokola kalungulo ove.

⁶⁴ Kilu lieve, a Yehova, kue yuka ocisola cove ka ci pui. Ndongise ovisila viove.

⁶⁵ A Yehova, wa linga ciwa lukuenje wove, ndeci ca tukula ondaka yove.

⁶⁶ Ndongise olondunge viocili lukũlihĩso, momo ñolela ovihandeleko viove.

⁶⁷ Osimbu sia longiwile nda tuñayala, cilo puãi mokola kondaka yove.

⁶⁸ Ove uwa, o lingainga ciwa. Ndongise ovisila viove.

⁶⁹ Vakuakulituna va mbihisa luhembi, ame puãi, mokola kalungulo ove lutima wange wosi.

⁷⁰ Ovitima viavo via neta ndulela, ame puãi, sanjukila ovihandeleko viove.

⁷¹ Ciwa omo nda tala ohali okuti ndi lilongisa ovisila viove.

⁷² Ovihandeleko viomela wove via mbelelapo, okuti olohũlũkai viulu lopalata vi sule.

⁷³ Ovaka ove a ndulika, hao a ñolisa. Nyihe olondunge hã si lilongisa ovihandeleko viove.

⁷⁴ Ava va ku sumbila, eci va mõla, va yolela, momo Kondaka yove, oko nda lavokaila.

⁷⁵ A Yehova, nda kũlĩha okuti olonimbu viove via sunguluka. Ndi civo okuti wa ndonga locili.

⁷⁶ Ocisola cove ka ci pui ci ndembeleke ndondaka wa popia lukuenje wove.

⁷⁷ Ohenda yove yi mitile hã si kala lomuenyo momo ovihandeleko viove ovio esanju liange.

⁷⁸ Vakuakulituna va kutiwe osõi, momo va njula luhembi, ame puãi, sokolola alungulo ove.

⁷⁹ Ava va ku sumbila va tiame kokuange, okuti va kũlĩha ovisila viove.

⁸⁰ Utima wange u sunguluke lovisila viove, oco si ka kutiwe osõi.

⁸¹ Utima wange u kasi longeva yeyovo liove. Ndavoka okuti ondaka yove yi lingiwa.

⁸² Ovaso ange a vuvala loku lavekela ohuminyo yove. Mula siti, Eteke lipi o ndembeleka?

⁸³ Nda likonya ndocipa covinyu vowisi, haimo lumue si ivalako ovisila viove.

⁸⁴ Viñami hẽ, oloneke viukuenje wove? Eteke lipi o tetuluila ava va suvalisa?

⁸⁵ Vakuepela va fẽlẽla akueve, haivo ka va pokola kovihandeleko viove.

⁸⁶ Ovihandeleko viove viosi viocili muẽle. Ovo va nalaisa ohali luhembi. Ngohele.

⁸⁷ Va kamba naito oku nyõla kilu lieve, ame puãi, sia yandulukile alungulo ove.

⁸⁸ Omo o kasi locisola ka ci pui oco popela omuenyo wange okuti mokola kolondaka viomela wove.

⁸⁹ A Yehova, ondaka yove yi tumãla hũ vovailu.

⁹⁰ Ocili cove ci kala kovitumbulukila viosi. Ove wa kolisa ongongo, kuenje yi kasi.

⁹¹ Londaka yove lopo yi tai toke etali, momo ovina viosi vi ku vumba.

⁹² Ovihandeleko viove nda ka via kaile esanju liange, nda nda nyõlẽha lohali yange.

⁹³ Lalimue eteke njivalako alungulo ove, momo wa mindula lao.

⁹⁴ Ndu wove. Mopele. Momo nda vanjiliya alungulo ove.

⁹⁵ Olondingaĩvi vi ndavekela ha vi nyõli, ame puãi, sokolola ovisila viove.

⁹⁶ Nda mõla esulilo liohuloñoloha kuosi, ocihandeleko cove puãi ca yanja cimue.

⁹⁷ Sole simue ovihandeleko viove. Ndukuaku vi sokolola ño-o eteke liosi.

⁹⁸ Ovihandeleko viove via muisa olondunge via piala, evi vioyanyali vange vi sule, momo ñasi lavio oloneke viosi.

⁹⁹ Uvanga ñasi lawo wa piãla, u wovalongisi vange vosi u sule, momo ndukuakusokolola ovisila viove.

¹⁰⁰ Vimue ka via lombolokele kovakulu, ame via ndomboloka, momo mokola kalungulo ove.

¹⁰¹ Olomai viange ndi vi tiula kolonjila viosi vĩvi hã si lingi ondaka yove.

¹⁰² Si pambuka kovihõlo viove, momo ove wa ndongisa.

¹⁰³ Olondaka viove vi sõsa cimue kelimi liange, vomela yange owiki u sule.

¹⁰⁴ Kalungulo ove oko njupopa olondunge, oco olonjila viosi viuhembi ndi vi nyale.

¹⁰⁵ Ondaka yove oyo ovela yolomai viange, haiyo ocinyi cokonjila yange.

¹⁰⁶ Nda lisinga kuenje nda ci kolisa, cokuti ndingainga ovihõlo viove viesunga.

¹⁰⁷ Nda talisua cimue ohali. Nyihe omuenyo, a Yehova, ndeci wa likuminya londaka yove.

¹⁰⁸ Tambula ovilumba viange viesivayo, a Yehova. Ndongise ovihõlo viove.

¹⁰⁹ Oloneke viosi omuenyo wange ndu kuete peka, puãi si ivalako ovihandeleko viove.

¹¹⁰ Olondingaĩvi via nela onjanjo, puãi sia lueyele alungulo ove.

¹¹¹ Ovisila viove nda vi tambula ndocipiñalo ka ci pui. Ovio onjolela yutima wange.

¹¹² Nda kapa utima woku lingainga ovisila viove, tunde opo toke ka ku ci.

¹¹³ Vakuavitima-vivali ndi va nyale, ovihandeleko viove puãi, ndi vi sole.

¹¹⁴ Ove wuciwundilo cange, haive wumbindikiyo yange. Ndavoka okuti ondaka yove yi lingiwa.

¹¹⁵ Nundi, ene alondingaĩvi, oco ndinge ovihandeleko via Suku yange.

¹¹⁶ Njakele ndohuminyo yove oco ñale lomuenyo. Si ka kutisue osõi osimbu ñasi lelavoko.

¹¹⁷ Ñolise, oco ñoke, kuenje sumbila ovisila viove oloneke viosi.

¹¹⁸ O sepuisa vosi va lueya ovisila viove. Ahãla avo osi olivova ño.

¹¹⁹ Ove winasi olondingaĩvi viokilu lieve ndovaña, oco sole ovisila viove.

¹²⁰ Etimba liange li ku lulumila lusumba, kuenje njokokela olonimbu viove.

¹²¹ Nda linga eci ca sunguluka haico cocili. Kuka sie lava va ñeleketa.

¹²² Likapa uvangi wukuenje wove. Vakuepela ka va ka nalise ohali.

¹²³ Ovaso ange a vuvala loku lavekela eyovo liove lokulingiwa kuohuminyo yove yesunga.

¹²⁴ Linga lukuenje wove ndocisola cove ka ci pui. Ndongise ovisila viove.

¹²⁵ Ndukuenje wove. Nyihe olondunge ovisila viove ha vi ndomboloka.

¹²⁶ Yilo oyo otembo ya Yehova yoku linga, momo va tomba ovihandeleko viove.

¹²⁷ Oco sole ovihandeleko viove, ulu u sule, ndaño ulu wa fina.

¹²⁸ Oco nda soka siti, Alungulo ove kovina viosi esunga. Olonjila viosi viuhembi ndi vi nyale.

¹²⁹ Ovihandeleko viove vi komohaisa, oco utima wange u pokola kokuavio.

¹³⁰ Elomboluilo liolondaka viove li eca ocinyi, kuenje li loñoluisa olonjambawa.

¹³¹ Ngasama omela kuenje ndaka omo nda livela ovihandeleko viove.

¹³² Pongolokela kokuange, ndinge ohenda, ndeci o lingainga lava va sole onduko yove.

¹³³ Kolisa okuenda kuolomai viange ndeci wa likuminya. Ku ka tave ekandu oku mbiala.

¹³⁴ Njovole kundiandia womanu, hã si pokola kalungulo ove.

¹³⁵ Tuisila ukuenje wove ocipala cove. Ndongise ovisila viove.

¹³⁶ Andunde ovava a sukumuha vovaso ange, momo omanu ka va pokola kovihandeleko viove.

¹³⁷ Ove wukuesunga, a Yehova, lolonimbu viove via sunguluka.

¹³⁸ Wa eca ovihandeleko viove lesunga kuenda locili cosi.

¹³⁹ Ombili yange ya ndia, momo ovanyali vange va ivalako olondaka viove.

¹⁴⁰ Olohuminyo viove via nyikiwa ocili, kuenje ukuenje wove o vi sole.

¹⁴¹ Ndutito, nda tombiwa, haimo si ivalako alungulo ove.

¹⁴² Esunga liove olio esunga ka li pui, lovihandeleko viove viocili.

¹⁴³ Ohali lolongembia vi ñuete, puãi ovihandeleko viove ovio esanju liange.

¹⁴⁴ Ovisila viove viesunga ka li pui. Nyihe olondunge oco ñale lomuenyo.

¹⁴⁵ Mbilikiya lutima wange wosi. Nambulule, a Yehova. Mokola kovisila viove.

¹⁴⁶ Mbilikiya kokuove, mopele, hã si pokola kovisila viove.

¹⁴⁷ Ndi limelẽha ociteketeke oku vilikiya okuti o ñuatisa. Nda lavoka ondaka yove.

¹⁴⁸ Osimbu okulendela kuteke ka kueyile, ovaso ange a lavulula okuti sokolola ondaka yove.

¹⁴⁹ Omo o kasi locisola ka ci pui, yeva ondaka yange. A Yehova, omo o kasi lesunga, tumbulula omuenyo wange.

¹⁵⁰ Ava va tiamela kevĩho va ñokela. Va kasi kupãla lovihandeleko viove.

¹⁵¹ Ove puãi o kasi ocipepi, a Yehova. Ovihandeleko viove viosi viocili.

¹⁵² Nda limbuka ale osimbu okuti ovisila viove wa vi sovuila oku kala ño-o hũ.

¹⁵³ Kũlĩhisa ongongo yange, mopele, momo si ivalako ovihandeleko viove.

¹⁵⁴ Sombele ondaka yange, njovuise. Nyihe omuenyo ndeci wa likuminya.

¹⁵⁵ Eyovo li kasi ocipãla lolondingaĩvi omo ka va vanjiliya ovisila viove.

¹⁵⁶ Ohenda yove, a Yehova, ya lua. Nyihe omuenyo, omo o kasi lesunga.

¹⁵⁷ Ovanyali, lava va nalisa ohali, va lua Ame puãi, sia pambukile kovisila viove.

¹⁵⁸ Nda vanja vakuevĩho kuenje ca mbala, momo ka va pokuile kondaka yove.

¹⁵⁹ Kũlĩhisa ndomo sole alungulo ove. A Yehova, omo o kasi locisola ka ci pui tumbulula omuenyo wange.

¹⁶⁰ Ohongele yolondaka viove, oyo ocili. Ovihõlo viove viosi viesunga. Ocihõlo locihõlo cenda hũ, ka ci pui.

¹⁶¹ Olosoma vi nalisa ño ohali olivova, utima wange puãi, u sumbila olondaka viove.

¹⁶² Njolaela ondaka yove ndu wa alula ovikuata via lua.

¹⁶³ Uhembi ndu suvuka, ndu nyale, ovihandeleko viove puãi, ndi vi sole.

¹⁶⁴ Ovihõlo viove viesunga, oco hu sivayaila olonjanja epanduvali keteke liongongo.

¹⁶⁵ Ava va sole ovihandeleko viove va kasi lombembua ya lua. Ka kuli eci ci tẽla oku va londuisa.

¹⁶⁶ Nda imba ovaso eyovo liove, a Yehova. Mokola kovihandeleko viove.

¹⁶⁷ Utima wange wa pokola kovihandeleko viove. Ndi vi sole cimue.

¹⁶⁸ Nda pokola kalungulo ove lovihandeleko viove, momo olonjila viange viosi vi kasi kovaso ove.

¹⁶⁹ Evilikiyo liange li pitile kokuove, a Yehova. Muise olondunge ndeci wa likuminya.

¹⁷⁰ Okulikutilila kuange ku pitile kokuove. Mopele ndomo wa likuminya.

¹⁷¹ Omela yange yi ku sivaya momo wa ndongisa ovisila viove.

¹⁷² Elimi liange li imbila ondaka yove ovisungo, momo ovihandeleko viove viosi viesunga muẽle.

¹⁷³ Eka liove li ngohele lombili, momo nda nõla alungulo ove.

¹⁷⁴ Nda livela eyovo liove, a Yehova. Ovihandeleko viove ovio esanju liange.

¹⁷⁵ Numalise lomuenyo okuti hu sivaya. Ovihõlo viove vi ngohele.

¹⁷⁶ Nda tungayala ndomeme ya nyelela. Sandiliya ukuenje wove, momo si ivalako ovihandeleko viove.