OLOSAMO 118 - Embimbiliya - Bíblia Sagrada em Umbundu

¹ Panduli Yehova momo eye uwa. Ocisola caye ka ci pui cenda hũ.

² Isareli a popie hati, Ocisola caye ka ci pui cenda hũ.

³ Onjo ya Arone yi popie yiti, Ocisola caye ka ci pui cenda hũ.

⁴ Ava va sumbila Yehova va popie vati, Ocisola caye ka ci pui cenda hũ.

⁵ Eci nda sakalala nda vilikiya Yehova. Yehova wa nambulula kuenje wa numbika oko kua tanda.

⁶ Eci Yehova a kasi lame si kuata usumba. Omunu he, o ndinga nye?

⁷ Yehova o kasi konele yange oku ñuatisa, oco mbanja ño ava va suvuka.

⁸ Ca velapo oku wunda ku Yehova, oku kolela omunu ci sule.

⁹ Ca velapo oku wunda ku Yehova, oku kolela olosoma ci sule.

¹⁰ Olofeka viosi via mungika. Nda vi nyõlela vonduko ya Yehova.

¹¹ Via mungika, via ñuala kolonele viosi. Nda vi nyõlela vonduko ya Yehova.

¹² Via mungika ndolonyihi, via taima ndondalu yolosongo. Nda vi nyõlela vonduko ya Yehova.

¹³ Nda sipatiwa enene, nda si oku nyõleha puãi Yehova wa ñuatisa.

¹⁴ Yehova eye ongusu yange, haeye ocisungo cange. Wa linga eyovo liange.

¹⁵ Yeveleli ondaka yoku uluila eyulo, yi kasi volombalaka violondingesunga, yiti, Eka lia Yehova liondio li lingainga lolohõlo.

¹⁶ Eka lia Yehova liondio lia kemãla. Eka lia Yehova liondio li lingainga lolohõlo.

¹⁷ Si fi, ñala lomuenyo kuenje sapula ovilinga via Yehova.

¹⁸ Yehova wa ndonga ci vala, puãi ka ngecele kokufa.

¹⁹ Njuluile olombundi viesunga okuti mitamo si pandula Yehova.

²⁰ Eyi oyo ombundi ya Yehova. Vakuesunga va pitamo.

²¹ Hu pandula omo wa nambulula, kuenje wa linga eyovo liange.

²² Ewe lina olomesele via li inasile, cilo lia linga ewe lievindi.

²³ Yehova wa ci linga. Ca komohisa ovaso etu.

²⁴ Lilo olio eteke lia sovola Yehova. Tu li yoleli loku li sanjukila.

²⁵ Tu popele, a Yehova. Tua livondela muẽle. A Yehova, tua livondela, tu salalise.

²⁶ U iyilila vonduko ya Yehova wa sumũlũha. Tu ku sumũlũisila vonjo ya Yehova.

²⁷ Yehova eye Suku, wa tu iha ocinyi. Omanu veye loku yolela lovianja. Va pitile kolombinga viutala.

²⁸ Ove Suku yange, ove hu pandula. Ove Suku yange, hu kemainya.

²⁹ Panduli Yehova omo eye uwa, lomo ocisola caye ka ci pui cenda ño-o hũ.