OLOSAMO 112 - Embimbiliya - Bíblia Sagrada em Umbundu

¹ Sivayi Yehova. Omunu o sumbila Yehova haeye o yolela ca lua ovihandeleko viaye, eye wa sumũlũha.

² Ombuto yaye yi pama kilu lieve. Omãla vondingesunga va sumũlũha.

³ Vonjo yaye mu li ovikuata lukuasi. Esunga liaye li enda ño-o hũ, ka li pui.

⁴ Vowelema mu tukuluka ocinyi ci tuila ondingesunga. Yehova ukuacali, ukuahenda, haeye ukuesunga.

⁵ Omunu ukuacali, haeye ukuaku undika, eye wa sumũlũha. Ovina viaye o vi endisa lesunga.

⁶ Momo ukuesunga lalimue eteke a sengiwa. Ondingesunga yi ivalukiwa oloneke viosi.

⁷ Ka kala lohele yolondaka viesumuo. Utima waye wa kolapo loku kolela Yehova.

⁸ Utima waye wa tuamẽla, ka kala lusumba, toke eci a yonguila ovanyali vaye ca tẽlisua.

⁹ Ecaeca oviali kolosuke. Esunga liaye li enda ño-o, ka li pui. Ombinga yaye yi petuka lulamba.

¹⁰ Ondingaĩvi o ci mõla, kuenje o sumua. O likeleketa ovayo aye, o sengeteta. Onjongole yondingaivi yi nyõleha.