OLOSAMO 111 - Embimbiliya - Bíblia Sagrada em Umbundu

¹ Sivayi Yehova. Mandula Yehova lutima wange wosi vonjango ya vakuesunga lo vekongelo.

² Ovilinga via Yehova vinene. Ava va vi sanjukila va vi kũlĩhisa.

³ Upange waye we yuka ulamba lunene. Esunga liaye li kala ño-o hũ, ka li pui.

⁴ Ovikomo viaye wa vi lingila onjivaluko. Yehova ukuacali haeye ukuahenda.

⁵ Ecaeca okulia kuava vo sumbila. Ohuminyo yaye ka yu limbi.

⁶ Wa tukulula komanu vaye unene wupange waye woku va iha ovipiñalo violofeka.

⁷ Ovilinga viovaka aye ocili lesunga. Ovisila viaye viocili muẽle.

⁸ Via kola, lalimue eteke vi pongoloka. Via sovuiwa locili lesunga.

⁹ Wa tumisa omanu vaye eyovo. Wa handeleka okuti ocisila caye ci laviwa otembo ka yi pui. Onduko yaye yi kola, haiyo yi koka oku sumbiwa.

¹⁰ Okusumbila Yehova oko efetikilo liolondunge. Ava vo sumbaila ovo va loñolõha cocili. Esivayo liaye li kala ño-o hũ, ka li pui.