OLOSAMO 110 - Embimbiliya - Bíblia Sagrada em Umbundu

Osamo ya Daviti.

¹ Yehova wa popia la cime cange, hati, Tumãla kondio yange toke hu lingila ovanyali vove ociliatelo cove.

² Yehova o tuma epangati liunene wove li tunda ko Siono. Viala muẽle pokati kovanyali vove.

³ Eteke o songola olohoka viove kolomunda vi kola omanu vove va lieca kokuove olumue. Ndokutalala kuowume womele haico ci kasi ongusu yove yokumalehe.

⁴ Yehova wa lisinga kuenje ka pongoloka, hati, Ove o linga ocitunda oloneke ka vi pui, ndeci ca linga Melikicedeke.

⁵ Yehova yu kondio yove. O nyanyola olosoma eteke lionyeño yaye.

⁶ O tetuluila olofeka, loku vi yukisa ovivimbi. O nyanyola olombiali violofeka via lua.

⁷ Eci enda vonjila o ka nyua volui, oco o petula noke utue.