OLOSAMO 109 - Embimbiliya - Bíblia Sagrada em Umbundu

Kusongui wolonjimbi. Osamo ya Daviti.

¹ A Suku ukuesivayo liange, ku kõhe nõ.

² Momo omela welimbi lovimela violondingaĩvi via ngasamela. Va ndundila ño-o levi haviociliko.

³ Va mungika lolondaka viesuvu. Va yaka lame olivova.

⁴ Ocisola cange va ci niuwila lalundi osimbu ame ndi va likutilila.

⁵ Oco, kueci ciwa va niuwilako cĩvi, kocisola cange va niuwilako esuvu.

⁶ U katuila ombiali yondingaĩvi. Omindiki yi kale kondio yaye.

⁷ Eci vo tetuluila a pie. Okulikutilila kuaye ku tendiwe ndekandu.

⁸ Oloneke viaye ka vi ka lue. Umue wiñi a tambule omangu yaye.

⁹ Omãla vaye va linge olosiwe, lukãi waye a linge ocimbumba.

¹⁰ Omãla vaye va ñuale ñuale loku eya. Va sandiliye ovingululu vioku kala.

¹¹ Ondiamolõlo yi tambule ovikuata viaye viosi. Vakualofeka va punde viosi a limuisa.

¹² Ka ku ka kale u u linga ohenda. Lomue ka ka tekole omãla vaye volosiwe.

¹³ Ombuto yaye yi imuiwe. Onduko yavo yi puile kocitumbulukila ci kuamamo.

¹⁴ Olohõle violosekulu viaye vi ivalukiwe la Yehova. Akandu a inaye ka a ka ime,

¹⁵ a kale hũ kovaso a Yehova. Eye a imule onjivaluko yavo kilu lieve.

¹⁶ Omo ka ivalukile oku linga ohenda, puãi wa suvalisa ohukui kuenda osuke lu wa teka kutima, toke kokufa.

¹⁷ Wa sola oku siñala, oco asiñalo eye kokuaye. Ka solele oku sumũlũisa, oco esumulũho li kale kupãla laye.

¹⁸ Wa wala asiñalo nduwalo waye, oco a iñile vetimba liaye ndovava, pamue ndulela vakepa aye.

¹⁹ A linge nduwalo waye a lisikilila, pamue nduvia a litika lawo eteke keteke.

²⁰ Eci ci linge onima yolomindiki viange yi tunda ku Yehova, haiyo yava va popia lavi utima wange.

²¹ Ame puãi, a Yehova, a Ñala yange, nundile olunda mekonda lionduko yove. Mopele momo ocisola cove ka ci pui, ciwa.

²² Momo ndihukui, haime ndisuke. Utima vokati kange wa asiwa.

²³ Nda takata ndocilelembia koñolosi. Nda takumuĩwa ndoluhuma.

²⁴ Olongolo viange via yonga loku likandangiya okulia. Omo ulela lakamue etimba lia kopa.

²⁵ Pokati kolomindiki viange nda linga ukuefuki. Eci va mõla va lipuka puka.

²⁶ A Yehova Suku yange, ngohele. Mopele ndocisola cove ka ci pui.

²⁷ Oco va limbuke okuti eli olio eka liove, love, ove Wa ci linga, a Yehova.

²⁸ Ovo va siñale ño, ove puãi sumũlũisa. Ava va ñatukila osõi yi va kute. Ukuenje wove puãi a yolele.

²⁹ Olomindiki viange vi walisue elaviso. Va sikililue losõi yavo nduwalo.

³⁰ Mandula cimue Yehova lomela wange. Ndu sivayaila pokati kowiñi womanu.

³¹ Momo o talama kondio yohukui, oku u popela kuava vo pisila okufa.