OLOSAMO 108 - Embimbiliya - Bíblia Sagrada em Umbundu

Ocisungo. Osamo ya Daviti.

¹ Utima wange wa tõla, a Suku. Njimbaimba ovisungo viesivayo.

² Otima wange, pasuka. Pasuki, asateriu lohalupa. Ame muẽle masula ongula.

³ A Yehova, hu panduila pokati komanu. Hu imbila ovisungo viesivayo pokati kolofeka.

⁴ Momo ocisola cove ka ci pui ca piãla enene, ca piãla ovailu. Ocili cove cenda ta kalende.

⁵ Tulamela ilu, a Suku. Ulamba wove u tulamele ilu lieve liosi.

⁶ Kuatisa leka liove liondio, tu tambulule, okuti ava va soliwa love va popeliwa.

⁷ Suku wa likuminya lokukola kuaye, hati, Nepaisa Siekeme, ngamula ocimbota ca Sukoti, kuenje ndi ci linga lesanju.

⁸ Gilati yange. Manase yange. Efarimi ombindikiyo yutue wange. Yuda epangati liange.

⁹ Moavi etasu liange lioku yuila. Njimba oluhaku ke Edome. Ngulula omo nda yula Filisiti.

¹⁰ O mitisa vimbo lia malehĩsua helie? O songuila ke Edome helie?

¹¹ Kua tu takumuile hẽ, a Suku? A Suku, ku tunda tunda vali lolohoka vietu.

¹² Tu kuatise oku yaka lunyali wetu, momo okupopela kuomanu ka ku silivila.

¹³ Eci Suku a kasi letu tu yaka lutõi. Eye o kosa ovanyali vetu.