OLOSAMO 107 - Embimbiliya - Bíblia Sagrada em Umbundu

ELIVULU LIATÃLO

¹ Pandoli Yehova momo uwa, momo ocisola caye ka ci pui cenda ño-o hũ.

² Ava va yovuiwa la Yehova va ci popie. Eye wa va yovola peka liunyali.

³ Wa vongolola kolofeka, kutundilo lo kutakelo, ko Norte lo ko Sul.

⁴ Vamue va tungayala vakalasoko, ka va sangele imbo lioku tungamo.

⁵ Va kala kala lonjala lenyona. Ovitima viavo via pua ongusu.

⁶ Oco va vilikiya Yehova pokusakalala kuavo, kuenje eye wa va popela kohali yavo.

⁷ Wa va pitisa vonjila ya suñama toke va pitila vimbo lioku tumalamo.

⁸ Va panduile Yehova ocisola caye ka ci pui! Vo panduile ovikomo a lingila omãla vomanu!

⁹ Momo o nyuisa ava va kasi lenyona, lu o kasi lonjala u kutisa evi viwa.

¹⁰ Vamue va kala kohali yovotuyike loku kapiwa kovikumbi viutale, va tumayala vowelema omu ka muli ocinyi,

¹¹ momo va sinila olondaka via Suku, loku lavisa elungulo lia Tõlo.

¹² Ovitima viavo via petamisua lupange wa kãla. Va kupuka kuenje u o va kuatisa ka kua kaile.

¹³ Oco va vilikiya Yehova pokusakalala kuavo, kuenje eye wa va popela kohali yavo.

¹⁴ Wa vopa vowelema omu ka muli ocinyi. Wa soyola ovikolo viavo.

¹⁵ Va panduile Yehova ocisola caye ka ci pui! Vo panduile ovikomo a lingila omãla vomanu!

¹⁶ Momo o nyõla olombundi viosipi, kuenje o teta pokati olomimbiliko viutale.

¹⁷ Vamue va honguisua lovituwa viavo viakandu. Olohõle viavo via va velisa.

¹⁸ Okulia kuosi kua va lingisa onyanya. Va kokela kolombundi viokufa.

¹⁹ Oco va vilikiya Yehova pokusakalala kuavo, kuenje eye wa va popela kohali yavo.

²⁰ Wa tuma ondaka yaye kuenje wa va sakula. Wa va popela kokunyõleha.

²¹ Va panduile Yehova ocisola caye ka ci pui! Vo panduile ovikomo a lingila omãla vomanu!

²² Va lumbe ovilumba violupandu. Va sapule ovopange aye lovisungo vionjolela.

²³ Vamue va lokila kokalunga lolonaviyu. Va fũla fũla votukalunga tunene.

²⁴ Va mõla mõla ovopange a Yehova, okuti ovikomo a linga valondo.

²⁵ Momo wa popia, kuenje wa pindula ofela yehunguhungu ya katula akimba aco.

²⁶ Va londa kilu, va lokila vali kalondo. Ovitima viavo via yenguka lokusakalala kuavo.

²⁷ Va tingoka, va hunga ndu wa kolua. Olondunge viavo viosi via pua.

²⁸ Oco va vilikiya Yehova pokusakalala kuavo, kuenje eye wa va popela kohali yavo.

²⁹ Wa tulumula ehunguhungu kuenje wa tulula akimba okalunga.

³⁰ Oco va yolela omo a tulumũha. Kuenje eye wa va nena ketapu va yongola.

³¹ Va panduile Yehova ocisola caye ka ci pui! Vo panduile ovikomo a lingila omãla vomanu!

³² Vo kemainyaile vohongele yomanu. Vo sivayaile vonjango yovakulu.

³³ Olondui o vi lingisa ndekalasoko, lolono viovava ndongongo ya kukuta,

³⁴ kuenda ofeka yovaima ndekango liomongua, mekonda lievĩho liava va tungamo.

³⁵ O lingisa ekango ndociva covava, longongo ya kukuta ndolono viovava.

³⁶ Haiko o tungisa ava va lambuka, ha va tungi imbo lioku tumalamo.

³⁷ Va linga ovapia, va kũla oviumbo viayuva, kuenje vongula ca liwewa.

³⁸ O va sumũlũisa okuti va licita calua. Kuenje ka tava okuti olongombe viavo vi tepuluka.

³⁹ Eci va tepuluka loku ketisua omo okukeleketua lovitangi lokusumua, ovio vialua

⁴⁰ oco itila elaviso kilu liolosoma, kuenje o va tuñayaisa vakalasoko omu ka mu li onjila.

⁴¹ Olosuke puãi, o vi upa kohali, kuenje o vi muisa omãla huti ño ocunda colomeme.

⁴² Vakuesunga, oku ci mõla, va yolela. Kuenje evĩho liosi li likuata komela.

⁴³ Vosi va kuete olondunge va sokolole ovina evi. Omanu vosi va sokolole ocisola ka ci pui ca Yehova.