OLOSAMO 105 - Embimbiliya - Bíblia Sagrada em Umbundu

¹ Panduli Yehova, vilikiyi onduko yaye. Sapuili omanu ovilinga viaye.

² Wimbili ovisungo. Wimbili ovisungo vie sivayo. Sapuli ovikomo viaye viosi.

³ Lituni londuko yaye yi kola. Ovitima viava va sanda Yehova vi yolele.

⁴ Sandi Yehova longusu yaye. Sandi ocipala caye oloneke viosi.

⁵ Ivaluki ovikomo a linga, ndaño ovilimbu viaye, kuenda olonimbu a tetulula,

⁶ ene ambuto ya Avirahama ukuenje waye, ene amãla va Yakoba, wa noliwi laye.

⁷ Eye Yehova Suku yetu. Olonimbu viaye vi li voluali luosi.

⁸ Oloneke viosi, ndaño kohulukai yovitumbulukila, eye ivaloka ohuminyo yaye, haiyo ondaka a handeleka.

⁹ Ohuminyo yaco wa yi likuminya la Avira hama, wa yeca ku Isake loku lisinga,

¹⁰ kuenje wa yi kolisavo ku Yakoba ndocisila, ku Isareli ndohuminyo ka yi pui,

¹¹ hati, Hu iha ofeka ya Kanana, ha yi lingi ocipiñalo cene.

¹² Eci handi ka va luile, okuti va kalaño vañamiñami, haivo ovakombe,

¹³ kuenje va tuñayala ño pokati kolofeka, oku tunda kuviali u, loku iya komanu vakuavo,

¹⁴ eye ka tavele umue oku va linga cĩvi, ndaño olosoma wa vi pisila eci via va linga cĩvi,

¹⁵ hati, Ko ka lambi kolombuavekua viange. Ko ka lingisi ovaprofeto vange.

¹⁶ Eci a kovongela ofeka yaco onjala, kuenje wa nyõla okulia kuosi kua va tekula,

¹⁷ wa yi kovonga tupu, kovaso yavo wa tumako ale omunu, eye Yosefe, u wa landisiwa kupika.

¹⁸ Olomai viaye va vi valula lovikumbi. Vo kapa alienge utale.

¹⁹ Ondaka ya Yehova yo nyika toke eci ca popia Yehova ca lingiwa ocili.

²⁰ Soma wa tuma oku u panduluisa. Ombiali yolofeka yo weca.

²¹ Wo tukula kalei konjo yaye, haeye ombiali yovikuata viaye viosi,

²² okuti o pindisa olombuale ndeci a panga, kuenje o longisa ovakulu vaye olondunge.

²³ Oco Isareli weya ke Egito. Yakoba wa vongela vofeka ya Hama.

²⁴ Yehova wa luisa cimue omanu vaye. Wa va pamisa ca piãla, ovanyali vavo ci sule.

²⁵ Wa tiamisa ovitima via va Egito poku suvuka omanu vaye, loku tumbila ovakuenje vaye ehãla.

²⁶ Wa tuma ukuenje waye Mose, la Arone u a nola.

²⁷ Wa linga olondimbukiso viaye pokati kavo. Wa linga ovikomo vofeka ya Hama.

²⁸ Wa tuma owelema kuenje wa tekavisa ofeka yosi. Ka va pokuile kolondaka viaye.

²⁹ Wa pongolola ovava avo, a linga osonde. Wa ipa olosi viavo.

³⁰ Ofeka yavo ye yuka ovinonga, ndaño volohondo violosoma viavo.

³¹ Eye wa popia, kuenje kueya asunga olonyi, lolona, kovikanjo viavo viosi.

³² Ombela wa yi pongoluisa ociwe. Wa va iha oviliakulo via ndelengela vofeka yavo.

³³ Wa punyulola oviti viavo viayuva lovikuyu viavo. Wa teya oviti viovikanjo viavo.

³⁴ Wa popia kuenje olohuma vieya, lapange ka a tendiwa.

³⁵ A lia ovikula viosi vofeka yavo. A lia ovaima a tunda kosi yavo.

³⁶ Wa kundula olonuñulu viosi vofeka yavo, okuti aveli ongusu yavo.

³⁷ Kovaso yaco wa songuila va Isareli. Va tunda vofeka lopalata lulu. Pokati kapata avo osi lomue wa hongua.

³⁸ Va Egito va yolela eci va tunda, momo va va kuatela usumba walua.

³⁹ Wa nyanyumula elende lia va tuvika. Ondalu ya eca ocinyi kuteke.

⁴⁰ Va lomba kuenje wa va avela olonenu. Wa va kutisa ombolo yokilu.

⁴¹ Wa tola ewe kuenje mua tumũha ovava. A pita vekango ndolui.

⁴² Momo wa ivaluka ohuminyo yaye y kola, kuenje Avirahama ukuenje waye.

⁴³ Oco, omanu vaye wa vopako lonjolela. Ava va noliwa laye va tunda lovisungo.

⁴⁴ Wa va avela ovisenge violofeka. Va piñala epako liupange womanu,

⁴⁵ ha va lingi ovisila viaye, loku pokola kovihandeleko viaye. Sivayi Yehova.