OLOSAMO 104 - Embimbiliya - Bíblia Sagrada em Umbundu

¹ Otima wange, sivaya Yehova. A Yehova Suku yange, ove wunene cimue. Wa paleka ulamba lunene.

² Wa lisikilila ocinyi nduwalo. Wa tamulula ovailu ndombalaka.

³ Wa pimbilika olohangalo violohondo viove kovava. Alende o-o a linga ekãlu liove. Wendela lavava ofela.

⁴ Ofela oyo wa lingisa olomunga viove. Ondalu lovilienge ovio via linga oloñuatisi viove.

⁵ Ove wa seveta oluali koviseveto vialuo okuti ka lu sengiwa vali.

⁶ Wa lu sikilila alondo nduwalo. Ovava a pitahãla olomunda.

⁷ Pokulemela kuove a tila. Kondaka yokulemila kuove a punguka.

⁸ Olomunda via yeluka, atapi a vota kolomangu wa vi lulikila.

⁹ Wa a kapela ulilo ka u pitahãliwa, okuti ka a tuvika vali oluali.

¹⁰ O tuiya olono kovimbota, vi pita pita pokati kolomunda.

¹¹ Vi nyuisa nyuisa ovinyama viosi viusenge. Ovimbulu viekalasoko vi limõla lavio enyona.

¹² Oko olonjila viokilu vi yalaela ovianju viavio. Vi lilaila pokati kovisapa viavo.

¹³ O tapela olomunda loku upa ovava kolohondo viove vi kasi kovailu. Oluali lue yuka epako liupange wove.

¹⁴ O kulisa owangu wolongombe, lovikũla vi silivila komunu, hopi posi okulia,

¹⁵ lovinyu vi sanjuisa utima womunu, kuenda ulela u ninisa ocipala caye, lombolo yi kolisa utima womunu.

¹⁶ Oviti via Yehova vie yuka ovava, okuti oviti violo-cedro via Levanone, vina eye a kũla.

¹⁷ Olonjila vi tungilamo ovianju viavio. Ohumbihumbi yi tunga onjo yayo voviti violofaya.

¹⁸ Olomunda visovi ovio violohombo viusenge. Asenje o-o ovilala violohuita.

¹⁹ Wa lulika osãi oku lekisa ovovo. Ekumbi li kũlĩha okuiñila kualio.

²⁰ O sovola owelema, kuenje kuiya uteke eci ovinyama viosi viovesisi vi tunda.

²¹ Ayove olohosi a komela ohuta yao. Okulia kuao a ku vanjela ku Suku.

²² Eci ekumbi li tunda, a yomboloka, a pekela pawungu ao.

²³ Omunu o tundila kupange waye, o kala kovonda yaye toke koñolosi.

²⁴ A Yehova, oviluvo viove via lua cimue. Viosi wa vi lulika lolondunge. Oluali lue yuka ovilulikilo viove.

²⁵ Okalunga kanene haiko ka tanda, koko. Mu kuete oviendalomuenyo ka vi tendiwa, evi vitito levi vinene.

²⁶ Oko ku pita pita olonaviyu. Haimo mu kasi ocimuandu wa ci lulika ha ci papalelamo.

²⁷ Viosi evi vi ku imba ovaso ove, hu vi muisa okulia kotembo yaco.

²⁸ Eci o vi ku iha, vi ku nola. Eci o nyanyumula eka liove, vi kuta evi viwa.

²⁹ Eci o wundisa ocipala cove, vi sakalala, leci o vi upa omuenyo, vi fa, vi tiukila posi yavio.

³⁰ Eci o tuma Espiritu liove, vi lulikua, kuenje ove o yovolola ovisenge.

³¹ Ulamba wa Yehova u kale oloneke viosi. Yehova a sanjukile ovopange aye.

³² Eye o tulukila osi kuenje yi luluma. O lamba kolomunda, ku tunda owisi.

³³ Njimbila Yehova ovisungo osimbu ñasi lomuenyo. Njimbila Suku yange ovisungo viesivayo osimbu ndi fuima.

³⁴ Ovisimilo evi viange viu sanjuise. Momo njolela Yehova.

³⁵ Vakuakandu va kunduke kilu lieve. Olondingaĩvi ka vi ka kaleko vali. Otima wange, sivaya Yehova. Sivayi Yehova.