OLOSAMO 103 - Embimbiliya - Bíblia Sagrada em Umbundu

Osamo ya Daviti.

¹ Otima wange, sivaya Yehova. Viosi vi li vonulo yange vi sivaye onduko yaye yi kola.

² Otima wange, sivaya Yehova. Ku ka ivaleko oviali viaye viosi.

³ Eye ecela akandu ove osi. O sakula ovoveyi ove osi.

⁴ O yovola omuenyo wove konjembo. O ku walisa ekolowa liocisola ka ci pui kuenda ohenda.

⁵ O kutisa utima wove evi viwa, hu lingi vali ukuenje ndongonga yulombo.

⁶ Yehova o lingila vakuahali esunga. O va tetuluila lesunga.

⁷ Wa lombolola ku Mose olonjila viaye, lovilinga viaye ku va Isareli.

⁸ Yehova Ukuahenda, o kasi locali, o livala konyeño. Ocisola caye ka ci pui ca lua cimue.

⁹ Ka lemaela ño-o hũ. Ka tema tema olonjanja viosi.

¹⁰ Ka lingile letu eci ca soka lovakandu etu. Eci ca sesamela olohõle vietu hacoko a tu muisa.

¹¹ Ocili, ndeci kilu kua lepa loposi haico ocisola caye ka ci pui kuava vo sumbila.

¹² Ndeci kutundilo kupãla lutakelo haico a kapa okulueya kuetu ocipãla.

¹³ Ndeci isia a kuetele omãla vaye ohenda, haico Yehova a kuetele ohenda ava vo sumbila.

¹⁴ Momo wa kũlĩha ovatimba etu, ivaluka okuti tuneketela.

¹⁵ Oku sokolola oloneke viomunu, via soka ndowangu. O telẽha ndoneleho yusenge,

¹⁶ momo ofela yi pitako kuenje ka yiko, lapa ya kala ka pa kũlĩhiwa vali.

¹⁷ Ocisola ka ci pui ca Yehova puãi, ci kasi tunde ka ku ci toke ka ku ci lava vo sumbila. Esunga liaye li solomohẽla komãla lo komãla,

¹⁸ kokuava va patekela ohuminyo yaye, ava va ivaluka ovisila viaye ha va vi lingainga.

¹⁹ Yehova wa tumbika ocalo caye kilu. Usoma waye u viala kovina viosi.

²⁰ Sivayi Yehova, ene avangelo vaye, uvakuolohõlo via piãla wu lingainga ondaka yaye. Wuvakuakutava kupopi wondaka yaye.

²¹ Sivayi Yehova, ene alohoka viaye viosi. Wuvakuenje vaye wakuakulinga ocipango caye.

²² Sivayi Yehova, avina viosi a lulika, kuoha kuviali waye. Otima wange, sivaya Yehova.