OLOSAMO 102 - Embimbiliya - Bíblia Sagrada em Umbundu

Elombelo liu o kasi kohali, eci a suvala enene kuenje o sapula ohali yaye ku Yehova.

¹ Yeva ohutililo yange, a Yehova. Uteto wange u pitile kokuove.

² Ku ka mbundisile ocipala cove eteke ñasi lohali. Mbonguile etui liove. Eteke mbilikiya nambulule lombili.

³ Momo oloneke viange vi takata ndowisi. Akepa ange a sanya ndondalu.

⁴ Utima wange wa vetiwa, haiwo wa kukuta ndowangu. Njivayalako oku lia okulia kuange.

⁵ Omo ndi leña leña enene oco ositu yange yi kakatela kakepa.

⁶ Nda linga ndepanda liovekalasoko. Nda lisoka lokacukucuku kovisitu.

⁷ Ñala ñala locipakupaku. Ndinga ndokanjila ka kasi lika wako kilu lionjo.

⁸ Eteke liosi ovanyali vange va fukilisa, lava va funguila va lisinga londuko yange.

⁹ Ndi lia lia etiko hutiño ombolo, kuenje vokunyua kuange nengamo asuẽlela,

¹⁰ omo ove wa funguila loku nemela. Ocili wa njelula, wa nyinasi.

¹¹ Oloneke viange vi linga ndocilelembia ci kasi loku lepa. Ñasi loku kukuta ndowangu.

¹² Ove puãi, a Yehova, o tumãla ño-o hũ. Onjivaluko yove yenda ño-o kovitumbulukila viosi.

¹³ O votoka, o linga Siono ohenda. Otembo yeya yoku u kuatela ohenda. Eteke lia tukuiwa lieya.

¹⁴ Momo akuenje vove va sanjukila ovawe alio, va kuatela oneketela yalio ongeva.

¹⁵ Olofeka vi sumbila onduko ya Yehova. Olosoma viosi viokilu lieve vi sumbila ulamba wove.

¹⁶ Momo Yehova o tunga Siono. O tukuluka lulamba waye.

¹⁷ O yeva ohutililo yolosuke. Ka pembula alombelo avo.

¹⁸ Eci cosi ci sonehiwile ocitumbulukila ci kuamamo, okuti omanu ka va citiwile handi va sivaya Yehova.

¹⁹ Vo sivaya, omo tunde kovailu a kola a kasi, wa vanja posi, okuti kilu Yehova a kasi, wa vanja posi,

²⁰ ha yevi okuleñaleña kuomandekua, loku pandulula ava va tukuiwila oku fa.

²¹ Wa ci lingila okuti omanu va tukowaila onduko ya Yehova vo Siono, lesivayo liaye vo Yerusalãi,

²² eci omanu kuenda olofeka vongolokela oku fendela Yehova.

²³ Wa leñelisa ongusu yange vumãlẽhe. Wa tepulula koloneke viange.

²⁴ Nda linga siti, A Suku yange, anyamo ove a enda ño-o kovitumbulukila viosi. Ku ka nimbuiyile oloneke viange.

²⁵ Konahululua wa seveta oviseveto violuali. Ovailu laovo upange wovaka ove.

²⁶ Vi nyõleha, ove puãi o kala ño-o hũ, ku pui. Viosi vi kuka ndolonanga, ove o vi pongolola nduwalo kuenje vi takata,

²⁷ ove puãi ku pongoloka. Anyamo ove ka a pui.

²⁸ Omãla vakuenje vove va tunga kuenje va koka, lombuto yavo yi tumalisua kovaso ove.