OLOSAMO 101 - Embimbiliya - Bíblia Sagrada em Umbundu

Osamo ya Daviti.

¹ Njimbila ocisola ka ci pui kuenda esunga. Kokuove muẽle njimbila, a Yehova.

² Sumbila onjila ya pua eko loku endelamo Eteke lipi o masula? Vonjo yange ndinga ukuesunga liovutima.

³ Si kapi cimue cĩvi kovaso ange. Suvuka ovilinga viava va konyõha. Ka vi nambi.

⁴ Umbinde wovutima u kala kupãla lame. Oku kũlĩha eci cĩvi si kuatako.

⁵ U o sokola ukuavo uyombeki ndu nyõla. Ukuakuyengulula ovaso, lukuotima wepela, si u tava.

⁶ Njimbila ovaso ange kolondingesunga vi kasi vofeka okuti vi tunga lame. Ukuakuendela vonjila ya suñama eye o mbumba.

⁷ Ukuakulimbika ka tumãla vonjo yange, lohembi ka yi kala kovaso ange.

⁸ Omele omele nyõla olondingaĩvi viosi viofeka, oku nyõla olondingakandu viosi vimbo lia Yehova.