OLOSAMO 10 - Embimbiliya - Bíblia Sagrada em Umbundu

¹ A Yehova, o talamela nye kupãla? Nye o salamela kolotembo viohali?

² Vakueviho va lituna kuenje va lupuisa olohukui. Va kuatiwe lolongombo va tumbika ovo muẽle.

³ Momo ondingaĩvi yi lipandiyila ocipango cutima wayo. Ukuacipululu o pukula Yehova, u tomba muẽle.

⁴ Ondingaĩvi lepela liocipala caye, yi linga yiti, Ka ndingi cimue. Ovisimilo viayo viosi viti, Ka ku li Suku.

⁵ Olonjila viaye viu salalisa olonjanja viosi. Okutetulula kuove ku kasi kilu, eye ka ku lete. Ava va tamalala laye o va siopa ño.

⁶ Vutima waye o popia hati, Si sengiwa. Olotembo viosi si moli ovitangi.

⁷ Omela waye we yuka oku popia andamba loku kemba lelimbi. Kosi yelimi liaye ku li evĩho lũvi.

⁸ O tumayala povilavekelo viovaimbo. Apa pa salama o pondela omãla vamale. Ovaso aye a lavulula vakuoputu.

⁹ Apa pa wunda opo o lavekela ndohosi vociwundilo cayo. O lavekela ha kuata osuke. Oco o kuata osuke loku yi koka lowanda waye.

¹⁰ O sipata ava ka va kuete oñuatisi. Va nyanyuiwa kuenja va fa longusu yaye.

¹¹ Vutima o sima sima hati, Suku wa ivalako, wa wundisa ocipala caye, lalimue eteke a ci mola.

¹² A Yehova, votoka. A Suku, tulika eka liove. Ku ka ivale vakuahali.

¹³ Ondingaĩvi nye yi tombela Suku? Nye yi simila vutima yiti, Ku ci siliha pua?

¹⁴ Ove oku ci mola o ci mola. O limbuka muẽle ohali lekangiso, hu vi fetuluinya leka liove. Ohukui yi litumbika kokuove. Ove wa linga oñuatisi yolosiwe.

¹⁵ Teya okuoko kukuakandu. Vanjiliya evĩho liondingaĩvi toke ka li sangiwa vali.

¹⁶ Yehova eye osoma otembo ka yi pui. Vakualofeka va pua vofeka yaye.

¹⁷ A Yehova, o yeva yeva uteto wava va kangisua. O kolisa ovitima viavo. O va vonguila etui liove

¹⁸ hu tetuluila olosiwe lava va talisua ohali, okuti omunu ukualuali lulo ka tẽla vali oku vokokisa.