OCISUNGO CA SALOMONE 8 - Embimbiliya - Bíblia Sagrada em Umbundu

¹ Nda wa kaile nda manjange, una wa nyama kavele a mãi! Nda nda ku sangele posamua nda nda ku sipuile, kuenje nda lomue wa membuile.

² Nda nda ku songuile loku ku iñisa vonjo ya mãi, vohondo muẽle yu wa nyita. Nda nda ku ihile ovinyu via litenga lolosimbolua, pamue ovava aroma, hu nyui.

³ Eka liaye liepĩli nda lia ñunamisile kutue! Eka liaye liondio nda lia ñuatele!

⁴ Afeko va Yerusalãi, ndu kisiki, siti, Ko ka tuñunyi ukuacisola cange, ndaño oku u pasula toke eci a yongola.

⁵ Helie o, o kasi loku tunda kekalasoko, loku kunamẽla kukuacisola caye? Kemẽhi lio-macieira oko nda ku pasuila, haiko nyõho a ku muĩla olongembia, haiko u wa ku cita wa ku tangelekela.

⁶ Ñape kutima wove ndesitikilo, ndondimbukiso kokuoko kuove; momo ongusu yocisola ya soka leyi yokufa; ukuelume wimõla ohenda; wa soka ndonjembo. Olosase viawo ndevi viondalu; ndovilienge vi liakoka.

⁷ Ovava a lua ka a tẽla oku ima ocisola, ndaño andunde ka a tẽla oku ci vombisa. Ocisola, ndaño omunu wa ci pitisila ukuasi wosi wonjo yaye, nda wa pembuiwa!

⁸ Tu kuete manjetu ukãi ka tundile handi avele. Nye eci tu lingila manjetu eteke lioku yonguiwa?

⁹ Nda wa kaile ocimbaka nda tua tungilileko ombindikiyo yopalata. Nda epito nda tua sitikilepo lavaya ovinendele via Levanone.

¹⁰ Nda kala ocimbaka; avele ange a kala ndolombonge, yu nda kala kovaso aye ndu o sanga ombembua.

¹¹ Salomone wa kala locumbo cayuva ko Baale Hamone; wa ci kundika peka liovatati, hã omunu omunu ho nenela apako aco a soka ndohulukãi yolombongo viopalata.

¹² Ocumbo cange, cange muẽle; ndi ci lilimila ame muẽle. Ove, a Salomone, ci tava oku kala lohulukãi yaco; ovatati vapako aco va kala lovita vivali.

¹³ Ene wa tungi voviumbo, pasuki; vakuetu va kasi oku yevelela kondaka yene; yi yevale muẽle.

¹⁴ Yayulako, okuacisola cange; liluvikiya ndomunya, pamue ndokanusi, kolomunda viovikũla vielemba liwa.