OCISUNGO CA SALOMONE 5 - Embimbiliya - Bíblia Sagrada em Umbundu

¹ Ndeya kocumbo cange, a manjange, a ndombua yange. Njunga mura yange loku kuata olosimbolua viange. Owiki wange wovovingo nda lia. Nda nyua ovinyu viange lasenjele. Akamba vange, li, nyui. Nyui ca lua, ene avakuacisola cange.

² Nda pekela otulo, utima puãi wa pasuka. Yeveleli! Ukuacisola cange o li loku totola! Hati, Njuluileko, a manjange, okuacisola cange, a pomba yange, okuetu wa pua atondelo. Utue wange we yuka owume; ocifuko cange ce yuka owume wa loka uteke.

³ Nda lula ale okapa yange; ndi yi wala vali ndati? Nda sukula olomãi viange; ndi vi liñisa vali ndati?

⁴ Ukuacisola cange wa iñisa eka liaye vepangu liepito, yu utima wange wa lisenga.

⁵ Nda votokela oku yuluila ukuacisola cange; ovaka ange a nosa mura, lovimuine viange via nosa atosi aco eci nda kuata kakuatelo aco.

⁶ Nda yuluila ukuacisola cange, puãi muẽle wa tundako, wa enda. Eci a popia utima wange wa sakalala. Ndo sanda, puãi sia tẽlele oku u sanga. Ndo vilikiya, puãi ekumbululo sio.

⁷ Olondavululi vioku ñuala ñuala imbo va sanga va numa, va nota olombole. Ovotati ovimbaka va nyẽha oveu yange.

⁸ Afeko va Yerusalãi, ndu piliki, siti, Nda wu sangi ukuacisola cange u sapuili okuti mbela ocisola.

⁹ Ofeko wa piãla oku posoka, anga, ukuacisola cove wa velapo ndati okuti vakuavo vosi va sule? Ukuacisola cove wa velapo ndati, okuti vakuavo vosi va sule? O tu ci kisikila nye?

¹⁰ Ukuacisola cange ukuetimba li yela, o kusuka; pokati kekui liolohũlũkãi eye fũ.

¹¹ Utue waye u molẽha ndulu wa fina. Ocifuko caye ca sitika ci tekãva ndocikuamanga.

¹² Ovaso aye a soka ndolopomba okonele yokalui; huti ño a sukuiwa lasenjele, o lie!

¹³ Atama aye ndocikandela covikũla vielemba liwa. Omẽla waye wa soka ndolonẽlẽho vi lowisa atosi omura.

¹⁴ Ovoko aye huti ño ovinunga viulu, a posuisua lovawe a tĩla. Etimba liaye li nina ndolombinga vionjamba, hailio lia lañiwa lovawe a safiru.

¹⁵ Ovolu aye ndolongunji viewe lia yela lie, via tumbikiwa kociseveto culu. Upolo waye wa soka nda Levanone; wa posoka ndovinendele viaco.

¹⁶ Upolo waye wa posoka. Ndu li vela ca lua; pa pia muẽle! Afeko va Yerusalãi, oco ca soka ukuacisola cange, haeye ekamba liange.