OCISUNGO CA SALOMONE 4 - Embimbiliya - Bíblia Sagrada em Umbundu

¹ Okuacisola cange, wa posoka cimue! Wundambi muẽle. Konyima yoveu yove ovaso ove a soka ndolopomba. Ocifuko cove ca soka ndocunda colohombo ci li oku lokila papati omunda ya Gileada.

² Ovayo ove a soka ndocunda colomeme via pemuiwa, apa vi tunda ketangi lioku sukuila. Viosi via cita olonjamba; layimue osiũle.

³ Omẽla wove wa soka ndelinya li kusuka nge; wa posoka muẽle. Konyima yoveu yove atama ove a molẽha ndolonepa vivali viaroma.

⁴ Osingo yove ya soka ndelavelo lia Daviti, hailio ociseleko covimalẽho, muna mua nyoñamela ohulukãi yolosipata kuenda olotevele violonoi kovita.

⁵ Avele ove avali a soka ndotumunya tuvali, haituo olonjamba, tu kasi oku lila pokati kolonẽlẽho.

⁶ Osimbu ka kua cile, osimbu muẽle ongula ka ya towile, ame ngenda komunda yamura lokowulu winsensu.

⁷ Okuacisola cange, kokuove eposo lika; etondelo lalimue.

⁸ Ko Levanone tundako, a Ndombua yange, hu iya kokuange. Tunda konumbuko ya Amana. Tunda konumbuko ya Senire la Herimone, kawungu olohosi, kolomunda violongue.

⁹ A manjange, a ndombua yange, wa sanyisa utima wange. Wa sanyisa utima wange eci wa mbanja lumosi lika. Ndaño omota yimosi yolomota vioposingo yove ya munda utima.

¹⁰ Ocisola cove ciwa, a manjange, a ndo mbua yange, ca pitahãla, ovinyu vi sule. Elemba liolonguendu viove lia velapo, olosimbolua viosi vi sule.

¹¹ A ndombua yange, omẽla wove u lowisa ca soka ndocisangua ci sosa. Kemẽhi lielimi liove ku kasi owiki lasenjele. Elemba liuwalo wove lia soka ndeli lia Levanone.

¹² Manjange, haeye ndombua yange, wa soka ndocumbo ca umbiwa, pamue ndono ya sitikiwa.

¹³ Olonjovelela viove via soka ndocumbo caroma; haico ce yuka apako a fina.

¹⁴ Mu li ocipuka la asafrau, lokalamu lokanela, kumue loviti viosi vielemba liwa, mura locandala kuenda olosimbolua viosi.

¹⁵ Ove wuno yovocumbo; wucisimo covava a talala; wa soka ndolondui vioku tunda ko Levanone.

¹⁶ Pasuka, afela yoko Norte, love, afela yoko Sul. Sikili ocumbo cange; elemba liaco liwa li yevale kofeka. Ukuacisola cange a iñile vocumbo caye, ha li apako aco a velapo.