OCISUNGO CA SALOMONE 3 - Embimbiliya - Bíblia Sagrada em Umbundu

¹ Kuteke, pula wange, nda livela u ndi sole ndomuenyo wange. Ndo sanda, puãi sio sangele. Ndo vilikiya, puãi ka ñumbuluile.

² Siti, Mbotoka; ñuala ñuala imbo loku pita kolokololo lovaluwa, si sandi u ndi sole ndomuenyo wange. Ndo sanda, puãi sio sangele.

³ Olondavululi vioku ñuala ñuala imbo via sanga, yu nda va pula siti, Wa mõli u ndi sole ndomuenyo wange, ale?

⁴ Yu nda va sia, kuenje hasimbuko nda sanga u ndi sole ndomuenyo wange. Ndu kuete, sia tavele oku weca toke ndo wiñisa vonjo ya Mãi, vohondo muẽle yu wa nyita.

⁵ Afeko va Yerusalãi, ndu kisiki lolomunya lolonusi viovanyãla, siti, Ko ka pasuli ukuacisola cange toke eci a yongola.

⁶ Nye oco ci li loku tunda kekalasoko, ndevonge liowisi? Ci kuete elemba lia mura lekokoto, leli liolosema viovafũli.

⁷ Tala! Oco owanda wa Salomone. Olonoi akui epandu vio ñuala; olonoi muẽle via Isareli.

⁸ Vosi vakuakuyaka losipata; okuyaka kua va ika. Vava, u losipata kuvia waye, u losipata kuvia waye, ha va lavoka eci ci va saluisa uteke.

⁹ Soma Salomone wa litungisila owanda; wo tunga loviti via Levanone.

¹⁰ Olongunji viaco viopalata; ohunamẽlo yaco yulu; omangu yaco yonanga yohũsu. Vokati kaco mua tongiwa locisola; afeko va Yerusalãi va tongamo.

¹¹ Tundi ya, afeko va Yerusalãi, ho tali Soma Salomone. Wa futisua ekolowa, lina inaye lio futisa lalio eteke lioku upisa uvala hailio eteke utima waye we yuka esanju.