OCISUNGO CA SALOMONE 2 - Embimbiliya - Bíblia Sagrada em Umbundu

¹ Ame ndilosa lioko Sarone, haime ndinẽlẽho yovovimbota.

² Ndonẽlẽho yopokati kolosongo, haimo mua soka ukuacisola cange pokati kafeko vakuavo.

³ Ndomaciera yopokati koviti viovusenge, haimo mua soka ukuacisola cange pokati kakuenje vakuavo. Nda tumãla vundembo waye; vutima mua sanjuka. Apako aye a mepa.

⁴ Wa nyiñisa vonjo yoku lia ofesta, yu epandela liocisola caye lia mapela vilu.

⁵ Ndise ayuva a kukuta; nalalise lolomasa, momo mbela ocisola.

⁶ Eka liaye liepĩli nda lia ñunamisile kutue! Eka liaye liondio nda lia ñuatele!

⁷ Ndu piliki, afeko va Yerusalãi; Ndu piliki muẽle lolomunya lolonusi viovanyãla, siti, Ko ka tuñunyi ukuacisola cange. Ko ko pasuli, toke eci muẽle a yongola.

⁸ Ondaka yukuacisola cange yi yevala! Tala, iya! O li loku sombokela kolomunda kuenda oku tehẽla koviwulu.

⁹ Ukuacisola cange wa soka ndomunya pamue ndokanusi. Tala, yu! O tai konyima yocimbaka cetu loku vanjela ponjanela, kuenda oku lengelela papangu olombindikiyo viaco.

¹⁰ Ukuacisola cange wa popia, wa mbanguisa. Hati, Pasuka, okuacisola cange, andambi yange; Tundamo; enju kokuange.

¹¹ Momo tala! Otembo yombambi ya pita. Ocikokoto ka ku li vali.

¹² Olonẽlẽho vi molẽha vali vofeka; kueya otembo yoku imba ovisungo, kuenje ocileñi conende ci yevala vofeka yetu.

¹³ Akuyu a fetika oku ima; ayuva a telẽha, a tunda elemba liwa. Okuacisola cange, votoka. A Ndambi yange, tu ende.

¹⁴ A Pomba yange, wa salama vapuluvi ovawe pamue vociwundilo covekungu, mole ocipala cove. Njeve ondaka yove. Momo ondaka yove yiwa; ocipala cove ca posoka.

¹⁵ Ñuateli otumbulu, tuna tu nyõla nyõla ayuva, momo voviumbo vietu viayuva mua teleha.

¹⁶ Ukuacisola cange wa linga muẽle wange, lame nda linga waye. Ukuakulisila oviunda viaye pokati kolonẽlẽho.

¹⁷ Osimbu ka kua cile, osimbu ongula ka ya towile, tiuka, okuacisola cange. Linga ndomunya pamue ndokanusi kolomunda vialupele.