OCISUNGO CA SALOMONE 1 - Embimbiliya - Bíblia Sagrada em Umbundu

¹ Ocisungo ca piala, haico ca Salomone.

² A sipule lasipulo omẽla waye! Momo ocisola cove ca velapo, ovinyu vi sule.

³ Olonguendu viove vioku sieketa vi kuete elemba liwa. Onduko yove ya soka ndonguendu eci yitilua. Oco afeko va ku solele.

⁴ Ñokele oku ku kuama; tu yayuleko. Soma wa nyiñisa volohondo viaye. Tu nyamũla loku ku sanjukila. Tu sivaya ca lua ocisola cove, ovinyu ci sule. Ca sunguluka okuti va ku sola.

⁵ Afeko va Yerusalãi, ndi tekãva tupu, haimo nda posoka. Nda soka ndolombalaka via Kedare; pamue ndolokutina via Salomone.

⁶ Ku ka nalele okutekãva kuocipala cange, momo utanya wa ñakula. Va kota va funguila. Va ñundika oku tata oviumbo viayuva, puãi viange muẽle sia vi tatele!

⁷ Sapuileko, ove hu sole ndomuenyo wange muẽle, apa o lisaila oviunda viove, lapa o vi kavuluaisaila ekumbi pongunji. Nye ndingila ndu o ñuala ñuala oku kuama oviunda via vakuẽle?

⁸ Okãi wa piãla oku posoka, nda kua ci kulĩhĩle, ka kuame olohoka vioviunda, oco o lise otuhombo tuove ocipepi lolombalaka viovangombo.

⁹ Okuacisola cange, hu sokisa lokavalu kamue kakalu a Fareo.

¹⁰ Atama ove a posoka. Osingo yove ya posuisua lolomota.

¹¹ Tu ku tungila evi viulu vioku posuisa, loku vi tokekisa latokekelo opalata.

¹² Eci Soma a tumãla komesa onguendu yange ya fina ya tunda elemba liwa.

¹³ Ukuacisola cange wa soka ndokacitungu ka mura

¹⁴ Ukuacisola cange wa soka ndocisakata colonẽlẽho vioviumbo viayuva oke Engedi.

¹⁵ Okuacisola cange, wa posoka; wundambi muẽle; ovaso ove a soka ndovaso opomba.

¹⁶ Lovevo wa posoka, okuacisola cange; o ñokela esanju; ula wetu u talala.

¹⁷ Olohangalo vionjo yetu ovinendele via Levanone; osoka yetu ovinjuanga.