NEHEMIYA 9 - Embimbiliya - Bíblia Sagrada em Umbundu

¹ Keteke liakui avali lakuãla kosãi yaco va Isareli va liongolola loku likandangiya okulia loku wala ovikeleyi loku kapa eve polonumbutue viavo.

² Kuenje epata lia Isareli lia litepa la vosi vakualofeka, yu va votokela oku litavela akandu avo lolohole violosekulu viavo.

³ Va votoka kuenje va tanga velivulu liovihandeleko via Yehova Suku yavo. Va tepisa eteke olonepa vikuãla. Onepa yimue va tanga velivulu lia Yehova Suku yavo. Onepa yikuavo va litavela loku fendela Yehova Suku yavo.

⁴ Kuenje Yesiua la Bani la Kadimiele la Siebaniya la Buni la Sierebiya la Bani la Keneni va talama kosikata ya va Lewi loku vilikiya Yehova Suku yavo lolukandi.

⁵ Kuenje va Lewi, kuenda Yesiua la Kadimiele la Bani la Hasiaviya la Siereviya la Hodiya la Siebaniya la Petahiya, va popia vati, Votoki loku sivaya Suku yene ukualoneke viosi hoti, Onduko yove yi kola haiyo ya piãla olopandu viosi lesivayo liosi, yi tumbangiyiwe.

⁶ Esera wa popia hati, Ove, ove lika, u Ñala. Ove wa tunga ilu lilu liovailu, lolombungululu viosi vi kasiko; haive wa tunga oluali lovina viosi vi kasimo, kuenda okalunga lovina viosi vi kasimo. Ove o vi tata tata ha vi kala kala lomuenyo. Avanda osi okilu a ku fendaila.

⁷ Ove Yehova Suku, haive wa nolele Avirama; wo wupa ko Huri ko va Kaldea yu wo luka onduko ya Avirahama.

⁸ Wa limbuka utima waye okuti wa ku sungulukila oco wa lisila laye ocisila cokuti o wiha ofeka ya va Kanana leyi ya va Hiti leyi ya va Amori leyi ya va Perisi leyi ya va Yevusi leyi ya va Girigasi hu yeci kombuto yaye. Yu wa linga ndeci wa likuminya omo ove ukuesunga.

⁹ Kuenje wa mõla ohali yolosekulu vietu ke Egito kuenda wa yeva okuvilikiya kuavo ko Kalunga Kakusuka.

¹⁰ Yu wa molehisa olondimbukiso lovilimbu ku Fareo lakuenje vaye vosi lomanu vosi vakuafeka yaye, omo wa kũliha ndomo va kala lolosekulu vietu lepembe lungangala. Kuenje ove wa limuisa onduko ya kemãla, toke ketali ya kemãla.

¹¹ Wa tepisa okalunga ndongongo kovaso avo okuti oco va pita vokati kokalunga ndopongongo ya kukuta. Ava puãi va va landula wa va imba vovalondo ndewe lia imbiwa vetãla.

¹² Kuenje kutanya wa va songuila longunji yelende, kuteke longunji yondalu ha yi va mihila vonjila va ilila.

¹³ Kuenje wa lokila komunda Sinai; ndaño o kasi kilu haimo wa vangula lavo. Wa va iha ovisila viocili lovihandeleko via sunguluka. Wa va iha ovihõlo viwa lovihandeleko.

¹⁴ Wa va situluila esambata liove li kola, kuenda wa va handeleka ovihandeleko lovisila lovihõlo lomẽla wukuenje wove Mose.

¹⁵ Eci va kala lonjala wa va iha ombolo yokilu. Eci va kala lenyona wa va tundisila ovava vesenje. Wa va sapuila oku iñila ha va kuata ofeka yina wa likuminya oku va iha.

¹⁶ Puãi ovo lolosekulu vietu va linga vakuemande haivo ovimbinde. Va sivisa itima viavo; ka va yevelile ovihandeleko viove.

¹⁷ Kuenje va likala oku ku pokola; ka va ivalukile ovikomo wa va lingila. Va sivisa itima viavo kuenda va linga ovisuanji. Va katula usongui wavo okuti va tiukila vali ke Egito kupika wavo. Haimo, ndaño oco, ove, omo wukuangecelo, wukuambembua, wukuahenda, o livala konyeño, haive ukuavilinga viohenda, kua va yandulukile.

¹⁸ Ndaño eci va litungila onale yutale wa yenguluiwa loku popia vati, Eyi oyo osuku yove ya ku upa ke Egito. —Loku vokiyako vali atonai a lua,

¹⁹ haimo, omo ohenda yove yalua, kua va yandulukile vekalasoko. Ongunji yelende yina ya va songoaila kutanya ka ya litepele lavo, ndaño ongunji yondalu yina ya va mihila kuteke ha yi va lekisa vonjila va ilila.

²⁰ Wa va iha Espiritu liove liohenda oku va longisa. Mana yove kua va limilile. Wa va iha ovava eci va kala lenyona.

²¹ Alima akui akuãla wa va tekula vekalasoko, lacimue va suka. Uwalo wavo ka wa puile, lolomãi viavo ka via lendele.

²² Wa va ihavo ovosoma lolofeka. Wa va tepisila olonele viosi viofeka; oco va kuata ofeka ya Sihoni, Soma ya Hesibone, leyi ya Oge, Soma ya Basiane.

²³ Kuenje wa luisa omãla vavo ndolombungululu viokilu yu wa va nena kofeka yina wa likuminyile lolosekulu viavo okuti va ka iñilamo oku yi kuata.

²⁴ Oco omãla vavo va iñilamo, va kuata ofeka yaco, kuenje ove wa va yulisa. Va yula olonungi viofeka okuti va Kanana, lolonungi viaco wa vi eca peka liavo, kumosi lolosoma viavio lomanu vavio, okuti va linga lavio ndeci va panga.

²⁵ Va kuata ovaimbo a limalehisa, losi yombolela, lolonjo vie yuka ovikuata viosi, lovisimo via felĩwa ale, loviumbo viayuva, loviumbo violiveira, levi vioviti vialua viapako. Oco va lia lia, ve kuta kuta, va neta kuenda va kala lelau omo ohenda yove yalua.

²⁶ Puãi haimo va linga ovimbinde; va tamalãla love; va imba konyima ovihandeleko viove. Va ipaya ovaprofeto vove, vana va va vetaiya okuti va tiukila kokuove. Pokati kaco va linga ovina via lua via puiya.

²⁷ Oco wa va eca peka liovanyali vavo, lovo va va talisa ohali. Puãi koloneke viohali ya vo va vilikiya kokuove kuenje ove wa va yeva ndaño o kasi kilu; kuenje, omo ohenda yove yalua, wa va iha ava va va yovola peka liovanyali vavo.

²⁸ Haimo, eci va tumãla vali ciwa va kuata vali kevĩho kovaso ove. Oco ove wa va eca peka liovanyali ha va va viala. Noke, eci va pongoloka, va vilikiya kokuove kuenje wa va yeva ndaño o kasi kilu. Kuenje, ndeci ca tuwa ohenda yove, wa va yovola olonjanja via lua.

²⁹ Wa va vetiya okuti va tiukila kovihandeleko viove. Haimo, va kuata emande, ka va pokuile kovihandeleko viove, puãi va lueya alungulo ove, ana okuti omunu nda o a lingainga o mõla omuenyo. Va konyoha kuenje va sivisa ovitima viavo, ka va yeveleko.

³⁰ Wa pandakaisa lavo anyamo a lua loku va lungula lEspiritu liove lovimẽla viovaprofeto vove. Puãi, haimo, ka va ku yevele, oco wa va eca peka lia vakualofeka viaco.

³¹ Haimo, omo ohenda yove ya lua, kua va nyolele, ndaño oku va yanduluka, momo ove wu Suku ukuakuecela haive ukuahenda.

³² Kaliye, a Suku yetu, wu Suku ukuonene, o linga usumba, haive o tẽlaisa ocisila cocisola ka ci pongoloka, ku ka tende ndocina cimue citito ohali yaco yalua ya tu veta, etu lolosoma vietu lolombuale vietu lovitunda vietu lovaprofeto vetu lolosekulu vietu kuenda omanu vove vosi, tunde koloneke violosoma via Asuria toke ketali lilo.

³³ Haimo ove ukuesunga pokati kovina viosi via tu veta, momo ove wa sunguluka; etu puãi tua linga vakuevĩho.

³⁴ Olosoma vietu lolombuale vietu lovitunda vietu lolosekulu vietu ka via lavele ovihandeleko viove. Ka va pokuile eci wa va handeleka. Ka va yevele kalungulo wa va lungula lao.

³⁵ Ndaño wa va iha usoma lelau lia lua, ndaño wa kapa kovaso avo ofeka yinene yi eca ciwa okulia, haimo ka va ku vumbile ndaño oku tinduka kovilinga viavo vĩvi.

³⁶ Cilo etali tuapika, tuapika muẽle vofeka wa yeca kolosekulu vietu ha va li apako ayo lelau liayo; omo muẽle tua lingila vakuakuvumba.

³⁷ Kuenda ovaima ayo a lua a kasi loku enda kolosoma vina wa vi kapa oku tu viala omo akandu etu alua. Va kasi oku tumila atimba etu lovinyama vietu ndocipango cavo. Pokati kaco tu kasi lohali ya lua.

³⁸ Oco oku ci sokolola, tu kasi oku lisila ocisila ka ci pongoloka loku lisonehamo. Kombuelo yaco asongui vetu la va Lewi lovitunda vietu va sonehakovo olonduko viavo.