NEHEMIYA 8 - Embimbiliya - Bíblia Sagrada em Umbundu

¹ Oco omanu vosi va liongoluila ndomunu umosi polusenje lua imba ovaso kombundi yovava. Va popia la Esera usonehi vati, Nena elivulu liovihandeleko via Mose vina Yehova a handelekele va Isareli.

² Oco eteke liatete kosãi yepanduvali ocitunda Esera wa tumbika ovihandeleko kovaso ohongele yalume lakãi la vosi va kuete ale olondunge vioku yeva.

³ Yu wa vi tangela polusenje lua imba ovaso kombundi yovava, tunde komele toke ekumbi pongunji wa vi tangela kovaso alume lakãi la vosi va tẽla oku yevako. Omanu vosi va kala loku yevelela lutate eci ca tangiwa velivulu.

⁴ Esera usonehi wa talama kembumba liavaya vo tungila. Kondio yaye kua talama Matatiyaf la Siema la Anaya la Uriya la Hilikiya la Maaseya. Kepĩli liaye kua talama Pedaya la Misiaele la Malikiya la Hasiume la Hasiabadana la Sakariya la Mesiulami.

⁵ Esera yu wa nyanyumula elivulu kovaso omanu vosi. Wa kala apa pa yeluka. Eci a li nyanyumula vosi va votoka vilu.

⁶ Esera yu wa sivaya Yehova Suku Tõlo, kuenje omanu vosi va taviya vati, Amene, Amene, loku tulika ovaka, loku fendela Yehova lovipala via petamela posi.

⁷ Kuenje Yesiua la Bani la Sierebiya la Yamini la Akuvi la Siabetai la Hodiya la Maaseya la Kelita la Asariya la Yosabada la Hanana la Pelaya, vosi va Lewi, va lomboluila omanu eci ca sonehiwa vovihandeleko osimbu omanu va tai vilu.

⁸ Va tanga lutate velivulu liovihandeleko via Suku. Eci va tanga haico va lombolola okuti ci va lomboloka.

⁹ Kuenje Nehemiya nguluvulu, la Esera usonehi, haeye ocitunda, la va Lewi, ava va longaisa omanu, va popia lomanu vati, Eteke lie tali li kola ku Yehova Suku yene. Oco ko ka lisiõsiõli pamue oku lila, momo omanu vosi va kala loku lila eci va yeva olondaka viovihandeleko.

¹⁰ Kuenda Esera wa popia lavo hati, Kuendi, ka li evi vi pepa, loku nyua ovinyu vi sosa loku tumisa ovikepa kuava ka va angiliyile cimue, momo etali eteke li kola ku Suku. Ko ka nyumali momo esanju lioku sanjukila Yehova olio ongusu yene.

¹¹ Va Lewi lavovo va va lembeleka, vati, Liwekipo oku lisiõsiõla momo etali eteke li kola, oco ko ka sumui ño.

¹² Oco omanu vosi va enda ha va li loku nyua loku tumisa ovikepa loku linga olofesta vinene, momo olondaka via va tangelua via va lomboloka.

¹³ Eteke liavali akulu vapata osi lovitunda la va Lewi va liongoluila ku Esera usonehi ha va pitulula lutate olondaka viovihandeleko.

¹⁴ Kuenje va sanga okuti vovihandeleko vina via eca Yehova lomẽla wa Mose va Isareli va handelekiwa oku kala vovisala kotembo yofesta yosãi yepanduvali,

¹⁵ loku ci sapula, loku imba oluiya kovaimbo avo osi, loko Yerusalãi, vati, Kuendi komunda; kopi ovianja violiveira levi viovilemba levi vieva levi vioviti ka vi laloka amẽla, oco wu tungi ovisala ndeci ca sonehiwa.

¹⁶ Oco omanu vosi va tunda, va kopile ovianja viaco ha va tungi ovisala, omunu kilu lionjo yaye, omunu kilu lionjo yaye, kuenda vovitali viavo, kuenda vovitali vionjo ya Suku, kuenda kolusenje luokombundi yovava kuenda kolusenje luokumbundi ya Efarimi.

¹⁷ Vosi ava va tunda kumandekua va tunga ovisala ha va kalamo. Tunde kovava a Yehosua, omõla a Nune, toke kotembo yaco va Isareli ka va la ci linga. Kua kala esanju lia lua.

¹⁸ Kuenje eteke keteke Esera wa tanga tanga velivulu liovihandeleko via Suku, tunde keteke liatete toke keteke lia sulako. Va sanjukila ofesta yaco oloneke epanduvali kuenje keteke liecelãla va linga efendelo li kola ndeci ca handelekiwa.