NEHEMIYA 6 - Embimbiliya - Bíblia Sagrada em Umbundu

¹ Kaliye eci Sambalata la Toviya la Geseme u Arabia lovanyali vetu vakuavo va yeva ndomo tua tunga ale ocimbaka kuenda okuti lalimue epuluvi lia sialako, ndaño sia kapele handi epito kolombundi,

² ovo va numĩla vati, Enju, oco tu likongele pamosi vimbo limue ketapi lia Ono. Puãi va sima oku ndinga lãvi.

³ Kuenje nda va tumisa olomunga siti, Ñasi oku linga upange unene, si tẽla oku tundako. Ci tava ndati okuti upange u liweka osimbu nundako oku iya kokuene?

⁴ Haico va tuma kokuange olonjanja vikuãla, kuenje olonjanja viaco vikuãla haico nda tambulula.

⁵ Oco Sambalata wa tuma onjanja yatãlo, wa tuma ukuenje waye wa ambata peka ukanda umue ka wa yikiwile.

⁶ Vukanda waco mua sonehiwa hati, Pokati komanu pa yevala, kuenda Gasamu layevo wa ci popia, okuti ove la va Yuda wa simi oku ñualelapo Soma, oco wa tungili ocimbaka. Kuenje ove o yongola oku linga osoma yavo. Oco muẽle omanu va kasi oku popia.

⁷ Ovaprofeto lavovo wa nola ha va imbi oluiya vo Yerusalãi vati, Cilo vo Yuda muli osoma. Kaliye, Soma ka kambi oku yeva olondaka evi. Oco enju, ha tu livangula pokati.

⁸ Oco nda tuma kokuaye siti, Pokati kovina wa tukula lacimue ca lingiwa. Ove wa ci sovola ño vutima wove.

⁹ Momo vosi va yongola oku tu lingisa usumba vati, Ovaka avo a liweka kupange okuti ko lingiwa vali. Puãi, a Suku, kolisa ovaka ange.

¹⁰ Eci nda iñila vonjo ya Siemaya, omõla a Delaya, omõla a Mehetavele, haeye wa kala kala ño vonjo yaye, eye wa popia lame hati, Tu endele pamosi konjo ya Suku vokati konembele, tu yike apito aco, momo va kasi loku iya oku ku ipaya, pokati kuteke muẽle veya oku ku ipaya.

¹¹ Ame puãi nda popia laye siti, Omunu ndame hẽ o tila nga? Kuenda vali, helie wa soka ndame o tela oku iñila vonembele loku kala lomuenyo?! Si iñila muẽle!

¹² Kuenje ca ndomboloka. Nda limbuka okuti Suku heyeko wo tuma, puãi owanji waco wo popela omo Sambalata la Toviya vo wiha ovitukiko.

¹³ Vo wihila ovitukiko okuti oco a ndingise usumba okuti ndinga muẽle ekandu liaco eli. Va lavokaile oku vĩhisa onduko yange okuti oco va sange evelo lioku njola epembe.

¹⁴ A Suku, linga la Sambalata kuenda Toviya eci ca soka lovilinga viavo, kuenda uprofetisa Noadiya layevo, lovaprofeto vakuavo vana va yonguile oku ndingisa usumba.

¹⁵ Oco tua malusula ocimbaka eteke liakui avali latãlo kosãi yElulu, okuti tua peselelako oloneke akui atãlo la vivali.

¹⁶ Kuenje eci ovanyali vetu vosi va ci yeva oco olofeka via tu ñuala via sakalala ca lua, kuenje via liketisa ca lua, momo va limbuka okuti upange waco wa lingiwa lekuatiso lia Suku yetu.

¹⁷ Kuenda koloneke viaco va lua vanene pokati ka va Yuda va sonahaila Toviya ovikanda via lua, lavovo va tambola ovikanda ku Toviya.

¹⁸ Momo va lua vo Yuda va lisililile laye omo eye ndatembo ya Siekaniya, omõla a Ara, kuenda omõlaye, Yehohanana, wa kuela omõla a Mesiulami, omõla a Berekiya.

¹⁹ Va sapowaila ame ovituwa viaye viwa, kuenda vo sapowaila eye cosi ame nda linga. Ndaño Toviya wa numaisa ovikanda vioku ndingisa usumba.