NEHEMIYA 5 - Embimbiliya - Bíblia Sagrada em Umbundu

¹ Noke puãi omanu vosi lakãi vavo va fetika oku vela calua va Yuda vakuavo.

² Momo vamue vati, Etu kumosi lomãla vetu valume lomãla vetu vakãi tua lova. Oco tu ihe okulia okuti tu lia, tu kala lomuenyo.

³ Vamue vakuavo vati, Tu kasi oku yekela ovapia etu loviumbo vietu lolonjo vietu ha tu sangi okulia pokati konjala eyi.

⁴ Vakuavo vali vati, Tua yekela ovapia etu loviumbo vietu viayuva ha tu feti olisimu.

⁵ Kaliye osonde yetu haiyo yimosi leyi ya vakuetu, lomãla vetu haico cimosi lomãla vavo. Haimo lumue omãla vetu tua va yekela ha va lingi apika. Omãla vamue vetu vakãi va linga ale apika, kuenje ka tu tẽla oku va yovola, momo ovapia etu loviumbo vietu vi kasi povaka amãle.

⁶ Eci nda yeva okulisiõsiõla kuavo leci va popia oco nda tema ca lua.

⁷ Nda sokolola vutima wange. Noke nda tamalala lomanu vanene lasongui siti, Omunu lomunu o kasi oku tambula osindike ku manjaye. Oco nda yala onjango yinene yoku va sombisa.

⁸ Nda popia lavo siti, Tua yovola vakuetu va Yuda va landisiwile ku vakualofeka ndeci tua tẽla, ene puãi wu landisa vamanjene. Vu va landisa okuti noke va landisua vali kokuetu? Oco voha ño, ka va sangele etambululo.

⁹ Nda popia vali siti, Haciwako eci wu kasi oku linga ndeti. Ka wa sesameleli hẽ oku kala lusumba la Suku yetu okuti wu tutuiya epembe lia vakualofeka ovanyãli vetu?

¹⁰ Ame la vakuetu lakuenje vange, letuvo tu kasi oku kuatisa omanu ava poku levalisa olombongo lokulia. Kaliye, vosi tu liwekipo oku tambula osindike.

¹¹ Va tiuwili etali muẽle ovisenge viavo, lovapia ayuva, lovapia Oliveira kuenda olonjo viavo, kumue losindike yaco yolombongo lotiliku lovinyu, leyi yulela, yina wa va yi kisakaili.

¹² Oco va popia vati, Tu va vi tiuwila muẽle, kuenje ka tu va kisika vali osindike. Tu linga muẽle ndeci wa popia. Oco nda pañinya ovitunda kuenje nda va kisika oku lisila okuti va linga ndeci va likuminya.

¹³ Kuenda nda tutumula kesusu lionanga yange, nda popia siti, Haico muẽle Suku a tundise vonjo yaye lokupange waye u wosi ka lingi ndohuminyo eyi, kuenda haico muẽle a tutumuiwe loku siala ño ndoto. Kuenje owiñi wosi womanu vati, Amene. Yu va sivaya Suku, kuenje va linga ndeci va likuminya.

¹⁴ Kuenda vali tunde kotembo nda noliwa oku linga onguluvulu yovofeka ya Yuda, okuti tunde kulima wakui avali wovava a Soma Aretasesete, toke kulima wakui atatu lavali wovava aye, okuti anyamo ekui la avali, ndaño ame ndaño vakuetu ka tua la tambula ocikepa cina cecawa kolonguluvulu.

¹⁵ Olonguluvulu viatete puãi, vina via livanga okuti ame nda va kuama, via punda punda omanu loku va kisika okulia lovinyu. Kilu liaco vali va va kisika oku eca akui akuãla kolosiekele viopalata. Akuenje vavo lavovo va tulamaila omanu. Ame puãi sia ci lingile momo nda kala lusumba la Suku.

¹⁶ Kuenda vali, nda kala kala kupange wocimbaka cilo, sia limuisile epia limue; lakuenje vange vosi lavovo va kala kala kupange waco.

¹⁷ Haime nda tekuila komesa yange muele ocita lakui atãlo kolosayendo via va Yuda. Kilu liaco kua kala vikuavo via tunda tunda kolofeka via tu ñuala.

¹⁸ Okulia tua angalaiya eteke keteke kuoku: Ongombe, lolomeme epandu vina via velapo, kuenda olosanji. Pokati koloneke ekui tua eca lumosi ovinyu via tẽla owiñi, waco wosi. Puãi ndaño oco, sia kisikile komanu ongaso yonguluvulu, momo okuvumba kuomanu vaco kua lua ale.

¹⁹ A Suku yange, cosi nda lingila omanu ava civaluka loku ci sumuluisila.