NEHEMIYA 4 - Embimbiliya - Bíblia Sagrada em Umbundu

¹ Eci Sambalata a yeva okuti tu kasi oku tunga ocimbaka, wa tokotelua lonyeno kuenje wa fuanguila va Yudea.

² Eye wa popia la vakuavo kuenda lowiñi wa va Samaria, hati, Va Yudea ovo, va leñela ndoto, va kasi oku linga nye? Va tumbulula hẽ eci ca nyolehele? Anga va lumba? Va ci mala hẽ eteke liongongo? Nda hẽ va nola vali ovawe pokati kolondunda viovimalañanya viaco haivio via pia ale londalu?

³ Kuenje Toviya u Amoni wa kala laye, yu wa popia hati, Ocili muẽle, leci va kasi loku tunga ndeti nda ombulu yaño yi londako yundumula lulelu ocimbaka cavo covawe.

⁴ Yeva, a Suku yetu, ndomo tua pembuiwa. Epembe liavo li wile kovitue viavo muẽle. Va eca ha va pundiwila vofeka yumandekua.

⁵ Ku ka tuvike evĩho liavo. Ekandu liavo ka li ka imuiwe kovaso ove, momo wa wenguila onyeño yove kovaso a vakuakutunga.

⁶ Oco tua tunga ocimbaka kuenda tua ci sitika, tua ci katula toke pokati lakati, momo omanu va kala lutima woku talavaya.

⁷ Puãi eci Sambalata la Toviya la va Arabia la va Amoni la va Asidode va yeva ndomo upange woku sakula ovimbaka u kasi oku amako, okuti apangu a fetika oku sitikiwa, oco va tema ca lua,

⁸ kuenje va tumbila pamosi ehala lioku iya oku yakisa Yerusalãi loku tatamisa upange waco.

⁹ Haimo tua likutilila ku Suku yetu, kuenje tua kapa olondavululi lutanya luteke oku va lavulula.

¹⁰ Yuda puãi wa popia hati, Ongusu ya vakuakututa ya tepuluka ca lua, kuenda ovimalañanya via lua. Ka tu tẽla oku tunga ocimbaka.

¹¹ Ovanyali vetu vati, Lacimue va limbuka, lacimue va mõla, toke tu iñila pokati kavo ha tu va ipaya loku imũla upange waco.

¹² Eci va Yuda, vana va tunga pokati kanyali vetu, veyaiya, va tu sapuila olonjanja ekui vati, Kolonele viosi, va kasi loku iya oku tu yakisa.

¹³ Oco vovimbota konyima yocimbaka, kuenda katapi, nda kapa omanu ndolondavululi. Nda va kapa epata epata, kuenje va kala lolosipata viavo lolonjelia viavo kuenda olohonji viavo.

¹⁴ Kuenje eci nda limbuka okuti va kasi lusumba oco nda vangula lomanu vanene lasongui lomanu vosi, siti, Ko ka va yokokeli. Ivaluki Yehova okuti onene, haeye o kola, oco wu yakeliko vamanjene lomãla vene valume lomãla vene vakãi lakãi vene lolonjo viene.

¹⁵ Eci ovanyali vetu va yeva okuti tua kũliha ehala liavo kuenje va limbuka okuti Suku wa li nyõla, oco tua tiukila vali kocimbaka, omunu kupange waye, omunu kupange waye.

¹⁶ Tunde keteke liaco onepa yolondingupange viange ya talavaya oku tunga, lonepa yikuavo ya maleha olonjelia loviyepelo lolohonji loviteyuilo. Lolombiali via linga onyima yepata liosi lia Yuda lia kala loku tunga ocimbaka.

¹⁷ Ava va kala loku tuta va talavaya ndomo: eka likuavo li talavaya upange, eka likuavo li kuata ovimãleho.

¹⁸ Kuenje vakuakutunga va maleha, omunu losipata yaye vombunda, omunu losipata yaye vombunda. Usiki wolumbeta wa kala pamosi lame.

¹⁹ Nda popia lasongui lolosayendo lomanu vosi vakuavo, siti, Upange wa lua, haiwo wa tanda calua, letu kocimbaka tua litepatepa ca lua, u popo, u popo.

²⁰ Oco kuosi wu yeveli okusika kuolumbeta oko muẽle lene letu tu likongela. Suku yetu o tu yakelako.

²¹ Oco tua talavaya upange kuenje onepa yimue ya maleha olonjelia tunde kongula toke kokutunda kuolombungululu.

²² Eteke liaco hailio nda popiavo lomanu siti, Omunu omunu lukuenje waye va tumãle vo Yerusalãi, oco vuteke va linge olondavululi, utanya va kale kupange.

²³ Oco ndaño ame, ndaño vamanjange, ndaño akuenje vange, ndaño olondavululi via kala lame, ka tua lulile uwalo wetu; omunu omunu wa kala locimaleho peka.