NEHEMIYA 13 - Embimbiliya - Bíblia Sagrada em Umbundu

¹ Eteke liaco va tangela omanu velivulu lia Mose yu va sanga okuti mua sonehiwa okuti va Amoni la va Moavi lalimue eteke va tẽla oku iñila vekongelo lia Suku,

² momo ka va tundile oku kuatisa omanu va Isareli lokulia lovava, puãi va feta Baliame okuti o va siñala. Haimo lumue Suku yetu wa pongolola esiñalo liaco ha li lingi esumũluho.

³ Eci omanu va ci yeva oco va tundisa vo Isareli vakualofeka vosi va litengele lavo.

⁴ Konyima yaco Eliasivi ocitunda, una wa tukuiwa oku tata olohondo vionjo ya Suku yetu, omo ositue la Toviya,

⁵ wa sokiyila Toviya ohondo yinene muna ale va selakaile ovilumba violomema la insensu, lovikuata, lolonepa viekui violomema, levi viovinyu, levi viulela, vina via handelekelua oku tekula va Lewi lolonjimbi la vakualombundi kuenda vo ovilumba vioku tekula ovitunda.

⁶ Haimo, kotembo yaco, ame sia kaile vo Yerusalãi, momo kulima wakui atatu lavali wa Aretasesete, Soma ya Bavulono, nda tiukilile ku Soma. Kovaso yotembo yimue nda pingile ku Soma oku ngeca.

⁷ Noke, eci nda pitila vali ko Yerusalãi kuenda nda limbuka ũvi wa linga Eliasivi poku sokiyala Toviya ohondo pokati kolohondo vionjo ya Suku,

⁸ oco nda ci suvuka ca lua, kuenje nda tundisila posamua ovikuata viosi via Toviya via kala vohondo yaco.

⁹ Kuenda nda handeleka okuti va yelisa olohondo viaco. Nda nenamo vali ovikuata vionjo ya Suku kumosi lovilumba violomema la insensu.

¹⁰ Nda sanga vo okuti va Lewi ka va va ihale olonepa vieteku liavo, oco va Lewi lolonjimbi, ava va linga upange, va tiukila, u koliavo, u koliavo.

¹¹ Oco nda tamalala lasongui vanene siti, Nye wu pukuili onjo ya Suku? Oco nda va ongolola yu nda va kapa vali, u kupange waye, u kupange waye.

¹² Noke va Yuda vosi va nena kolohondo vioku seleka olonepa viekui violomema levi viovinyu levi viulela.

¹³ Kuenje nda tukula Sielemiya ocitunda, la Sadoke usonehi ha va tati ovilumba. Nda kapa vali Pedaya u Lewi kumue lavo. Oñuatisi yavo Hanani, omõla a Sakuri, omõla a Mataniya. Ovo omanu va kolelua. Ocikele cavo oku amuila vakuavo.

¹⁴ A Suku yange, njivaluke loku ivaluka ndomo nda linga. Ku ka ivaleko upange uwa nda lingila onjo ya Suku yange lovisila viayo.

¹⁵ Koloneke viaco nda mõla pokati ka va Yuda vamue va kala loku kosa ayuva eteke liesambata. Va tuikavo ovimbulu otiliku lovinyu layuva lakuyu kuenda ovitele viñi viñi ha va vi nena vo Yerusalãi eteke liesambata. Oco eteke liaco muẽle, eci va landisa okulia, nda va lemela.

¹⁶ Kua kalavo vamue va Turo va tunga vo Yerusalãi, lavovo va nena nena olosi lovilia viñi viñi ha va vi landaisa ku va Yuda vo Yerusalãi eteke liesambata.

¹⁷ Oco nda vetisa evelo asongui vanene va Yuda siti, Wu lingi ndati ũvi ulo woku vihĩsa eteke liesambata?

¹⁸ Hacoko nga olosekulu viene via lingile kuenje Suku yetu yu wa talisa ohali eyi tu kasi layo, letu limbo lilo? Kaliye ene, pokati koku vihĩsa esambata, wu kasi oku yukinya vali owuya wonyeño yaye a yi kuatela va Isareli.

¹⁹ Oco, kesumbavelo liesambata eci kueya ale okaluwumbulu nda tuma oku yika olombundi. Nda sapulavo siti, Ka ci tava oku vi yikulula te esambata lia pita, kuenje nda kapa akuenje vamue vange kolombundi okuti ka ku piti ocitele cimue eteke liesambata.

²⁰ Kuenda olonjanja vakuakufũla la vakualondando viñi viñi va landaisaila koluwa eteke liesambata.

²¹ Puãi nda tamalala lavo siti, Wu ci lingila nye, oku kala kala koluwa? Nda wu ci lingi vali ndu yambuli. Kuenje tunde keteke liaco ka veyile vali.

²² Noke nda tuma va Lewi oku liyelisa loku iya oku lava olombundi, oco esambata li kole. Oco lacovo ci njivalukile, a Suku yange, loku supisapo kokufa pokati kohenda yove ya lua.

²³ Koloneke viaco haivio nda mõla va Yuda va kala loku kuela akãi va Asidode la va Amoni la va Moavi.

²⁴ Kuenje omãla vavo, eci va vangola, ka va telẽle elimi liocili lia va Yuda, puãi va tengamo elimi lia va Asidode lalimi akuavo.

²⁵ Oco nda litamalala lavo yu nda va siñala. Vamue nda va puma loku sunya ocifuko cavo. Kuenje nda va pangisa oku lisila la Suku okuti ka va kuelisa vali omãla vavo vakãi lomãla valume va vakualofeka, ndaño oku kuelisa omãla vavo valume lomãla vavo vakãi, ndaño ovo muẽle oku likuela la vakualofeka.

²⁶ Nda popia lavo siti, Eli halioko he ekandu Salomone, Soma ya va Isareli, a lueya lalio? Kolofeka viosi ka kua la kala osoma yikuavo ya lisoka laye. Wa soliwa la Suku yaye kuenje Suku wo kapa Soma ya va Isareli vosi. Puãi ndaño eye muẽle wa tambiwa lakãi va vakualofeka ha lingi ekandu.

²⁷ Oco ci tava nga okuti ene wu linga ũvi u unene loku liweka oku sunguluka ku Suku pokati koku likuela la vakualofeka?

²⁸ Umue omõla a Yoyada, omõla a Eliasivi, wa kuela omõla a Sambalata u Horoni kuenje ndo lupuisa.

²⁹ Va ivaluka, a Suku, momo va vĩhĩsa upange wovitunda lovisila via va Lewi.

³⁰ Oco muẽle ndoco nda va yelisa kovina viosi via vakualofeka kuenda nda sokiya upange wovitunda lu wa va Lewi, u upange waye, u upange waye.

³¹ Nda sokiyavo ovilumba violohui ha viyaiya koloneke via tukuiwa, kuenda ovaima atete laovo nda sokiyavo. Njivaluke, a Suku, loku ci nendela ndesunga.