NEHEMIYA 12 - Embimbiliya - Bíblia Sagrada em Umbundu

¹ Ovitunda la va Lewi vana veyile la Seruvavele, omõla a Sialitiyele, la Yesiua, vava: Seraya, Yeremiya, Esera,

² Amariya, Maluki, Hatusi,

³ Siekaniya, Rehumi, Meremote,

⁴ Ido, Ginetoi, Aviya,

⁵ Minjamini, Maadiya, Biliga,

⁶ Semaya, Yoyarivi, Yedaya,

⁷ Salu, Amoki, Hilikiya, la Yedaya. Ovo ovitue viovitunda loloñuatisi viavio kotembo ya Yesiua.

⁸ Va Lewi vava: Yesiua, Binui, Kadimiyele, Sierebiya, Yuda la Mataniya. Eye la vakuacisoko caye va songola upange wolonjimbi.

⁹ Vakuavo Bakibukiya la Uno, ovo va lilendaila lavo kolonepa viavo vioku lendela.

¹⁰ Ocikoti caco ceci: Yesiua eye so ya Yoyakimi, Yoyakimi so ya Eliasivi, Eliasivi so ya Yoyada,

¹¹ Yoyada so ya Yonatão, Yonatão so ya Yadua.

¹² Kovava a Yoyakimi ovitunda via kala ovitue viovisoko vievi: Meraya wa Seraya, Hananiya wa Yeremiya,

¹³ Mesuliama wa Esera, Yehohanana wa Amariya,

¹⁴ Yonatão wa Maluki, Yosefe wa Siebaniya.

¹⁵ Adana wa Harimi, Helikai wa Merayote,

¹⁶ Sakariya wa Ido, Mesualiama wa Ginetoni,

¹⁷ Cikiri wa Aviya, Pilitai wa Miniamini, wa Moadiya,

¹⁸ Siamuwa wa Biliga, Yehonatana wa Semaya,

¹⁹ Matenai wa Yoyarivi. Usi wa Yedaya,

²⁰ Kalai wa Salai, Evere wa Amoko,

²¹ Hasiaviya wa Hilikiya, Netanele wa Yedaya.

²² Kovava a Eliasivi va Lewi vamue, okuti Yoiada la Yohanana la Yaduwa, va sonehiwa okuti ovo ovitue viovisoko, haico ovitunda kovava a Dariu, Soma ya va Persia.

²³ Va Lewi va sonehiwa velivulu liasapulo, okuti ovo ovitue viovisoko toke koloneke via Yohanana, omõla a Eliasivi.

²⁴ Ovitue via va Lewi vava: Hasiaviya, Sierebiya, la Yesuwa, omõla a Kadimiele. Vakuavo va pita pita kovaso avo loku sivaya loku imba olopandu ndoku litaviya ocisoko locisoko ndeci ca sapuiwa la Daviti, omunu wa Suku.

²⁵ Mataniya la Bakuvikiya la Ovadiya la Mesiuliami la Talimone la Akuvi, ovo vakualombundi, va lava lava olohondo vioku seleka vi lisungue lolombundi.

²⁶ Ovo omanu va kalako koloneke via Yoiakimi, omõla a Yesuwa, omõla a Yocadaka, kuenda koloneke via Nehemiya, nguluvulu yaco, kuenda koloneke via Esera ocitunda haeye usonehi.

²⁷ Kotembo yefendelo lioku tumbika ocimbaka ca Yerusalãi oco va vanjiliya va Lewi kovitumãlo viavo viosi ha va va nena ko Yerusalãi okuti va kala kefendelo liaco lioku tumbika lesanju lolopandu lovisungo kuenda ovisikilo viñi viñi ndeci olosimbalu lolohalupa lotulialia.

²⁸ Ovasiki vaco lolonjimbi viaco va liongoluila pamosi loku tunda kenyala lia ñuala Yerusalãi, lokovaimbo a va Netofi,

²⁹ lokovapia a Giligali kuenda ko Geva la Asimavete; momo ovasiki va tunga ovaimbo avo oku ñuala Yerusalãi.

³⁰ Noke ovitunda la va Lewi va liyelisa kuenda va yelisa omanu vosi lolombundi locimbaka.

³¹ Oco nda sapuila asongui va Yuda oku londa kocimbaka. Nda sokiya ovisoko vivali vinene viava va imba olopandu, loku enda vovilala. Catete ca pita kocimbaka konele yondio yombundi yokeyala.

³² Konyima yavo ku kuãi Hosiaya kuenda onepa yasongui va Yuda.

³³ La Asariya, Esera, Mesiuliami,

³⁴ Yuda, Benjamini, Siemaya, Yeremiya,

³⁵ kuenda omãla vamue vovitunda va kuete olombeta, okuti Sakariya, omõla a Yonatão, omõla a Siemaya, omõla a Mataniya, omõla a Mikaya, omõla a Cakuri, omõla a Asafe;

³⁶ lava va tiama kokuaye okuti Siemaya, Asarele, Milalai, Gilalai, Maai, Netanele, Yuda, la Hanani. Ovo va ambayata ovisikilo via Daviti, omunu wa Suku. Esera usonehi wa pita kovaso.

³⁷ Va enda kombundi yokono ya kala kovaso. Va londa osikata yombonge ya Daviti apa pa lamanela kocimbaka konano yonjo ya Daviti toke oku pitila kombundi yovava kutundilo.

³⁸ Ocisoko cikuavo cava va imba olopandu ca enda kepĩli. Ame nda kuamako kumosi lonepa yikuavo yomanu. Tua vamba ocimbaka konano yolofolono toke apa ocimbaka ca tanda.

³⁹ Noke tua piãla kombundi ya Efarimi, lokombundi yale, lokombundi yolosãi, kuenda kombonge ya Hananele, leyi ya Hameya, toke kombundi yolomeme. Oco veya, va talama kombundi yokaliye.

⁴⁰ Noke ovisoko viaco vivali via talama konjo ya Suku. Lonepa yasongui lame haiko tua kala.

⁴¹ Kua kalavo ovitunda evi: Eliakimi, Maaseya, Miniamini, Mikaya, Elioenai, Sakariya la Hananiya. Ovo va kala lolombeta.

⁴² Kua kalavo Maaseya, Siemaya, Eleasara, Usi, Yehohanana, Malikiya, Elami la Esere. Olonjimbi via imba londaka ya lua, usongui wavio Yesirahiya.

⁴³ Eteke liaco va lumba ovilumba vinene, kuenje va yolela momo Suku wa va muisa esanju lia lua. Akãi lomãla vatito lavovo va yolela. Lonjolela ya kala vo Yerusalãi ya yevala kupãla.

⁴⁴ Eteke liaco va tukula alume va kala kala lupange woku tata olohondo vioku seleka ovilumba lovaima atete lolonepa viekui. Ovo muẽle haivo va tukuiwa oku kongola kovaimbo osi lokovapia aco olonepa via tukuiwa vovihandeleko vioku tekula ovitunda la va Lewi. Momo va Yuda va sanjukila ovitunda la va Lewi va kalako.

⁴⁵ Olonjimbi la vakualombundi lavovo va linga upange wa Suku wa va tukuiwila, lupange woku yelisa ndeci ca handeleka Daviti lomõlaye Salomone.

⁴⁶ Momo kotembo ya Daviti la Asafe, tunde kosimbu muẽle, Asafe eye usongui wolonjimbi kuenje kua kala ovisungo viesivayo lolopandu.

⁴⁷ Kuenda koloneke via Seruvavele la Nehemiya, omanu vosi va Isareli va eca eca olonepa kolonjimbi loko vakualombundi, u eteke liaye, u eteke liaye. Va tepailakovo olonepa via va Lewi, kuenda va Lewi va tepailako olonepa viovitunda.