NEHEMIYA 1 - Embimbiliya - Bíblia Sagrada em Umbundu

¹ Olondaka via Nehemiya, omõla a Hakaliya. Kulima wakũi avali, kosãi ya Kisileu, eci nda kala kombala ya Susana,

² oco kueya Hanani, umue po vamanjange, kuenda vantue va Yuda. Kuenje nda va pula va Yuda vana va pulukile, va supilepo kumandekua. Nda pulavo Yerusalãi.

³ Yu va sapuila vati, Ava va supapo va kasi vofeka yetu okuti ka va ile kumandekua, va kasi lelamba lohali. Ocimbaka ca Yerusalãi lacovo ca teka, lolombundi via pia londalu.

⁴ Eci nda ci yeva nda tumala, nda lila loku litetela oloneke vimue. Nda likandangiya okulia loku likutilila ku Suku yokilu.

⁵ Nda popia siti, A Yehova, Suku yokilu, ove Suku enene, haive o kola, haive o telãisa ocisĩla cove cohenda kokuava vosi va ku sole haivo va lingainga ovihandeleko viove;

⁶ ovaso ove a vanje; ovatui ove a yevelele hu yevelela ohutililo yukuenje wove ñasi oku likutilila kokuove lutanya luteke. Ñasi oku likutililila va Isareli, akuenje vove, haime ndi litavela akandu a va Isareli tua ku lueyela. Ndaño ame, ndaño epata liolosekulu viange, vosi tua lueya.

⁷ Kovina viosi tua ku linga lãvi. Ka tua tatele ovihandeleko lovisĩla lovihõlo vina wa eca kukuenje wove Mose.

⁸ Ivaluka ocikundi wa eca ku Mose, huti, Nda wu ñualelipo ndu sanduili pokati kolofeka.

⁹ Puãi nda wu tiuka kokuange ha wu tati ovihandeleko viange loku vi linga, omanu vene vana va lisandula, ndaño va enda kupãlapãla, haimo ndi ka vopako loku va nena vali kocitumãlo cina nda nolẽla onduko yange.

¹⁰ Ava, ovo akuenje vove, haivo omanu vove vana wa yovola lunene wove wa lua leka liove lia pama.

¹¹ A Yehova, etui liove li yevelele ohutililo yukuenje wove leyi yakuenje vove vosi va sole oku sumbila onduko yove. Sumulũisa ukuenje wove etali. U linga ohenda kovaso omunu u. Ca kala okuti kotembo yaco ame ndukuakopo ya Soma.