NAHUMI 3 - Embimbiliya - Bíblia Sagrada em Umbundu

¹ Ohali yiya kimbo liosonde, hailio imbo lie yuka uhembi lumunu, lokupunda ka ku puimo.

² Osikote,— Cue! Cue! Alola,— Kungulututu! Kungulututu! Otuvalu,— Tua! Tua! Akãlu ovita,— Puala! Puala!

³ Va endela kotuvalu,— haku yayako! Osipata,— haku ninako! Onjelia,— haku ndelengako! Lava va fa,— va tendiwa nga! Ovivimbi,— halondunda! —Vi sulila he? Va lipundokamo vovivimbi!

⁴ Cosi eci ciyilila upuepue walua wocipuepue ca posoka, haico ci kuete atutu evĩho oku tamba. Ci pakula olofeka lupuepue waco, kuenda omanu latutu aco.

⁵ Ca popia Yehova Ukualohoka ceci, hati, Tala! Nda ku ñualẽlãpo. Mundula onanga yove okuti olofeka vi mõla epõlõla liove, kuenda ovosoma a vanja osõi yove.

⁶ Hu imbila eniña. Hu pembula. Hu lingisa ocisepelei.

⁷ Oco vosi va ku mõla va ku tila, vati, Ninivei ya nyõlẽha. Helie u lilila? Sandiliya pi ava vo lembeleka?

⁸ Ove nga, wa velapo okuti Tebe o sule? Tebe wa kala ocipepi lolui Nilu, wa ñualĩwa lovava. Ovimbaka viaye okalunga, lovimano viaye ovava.

⁹ Etiopia la Egito ovo va kala ongusu yaye, kuenje ka vo limĩlĩle cimue, Puti la Luvi ovo va kala oloñuatisi viaye.

¹⁰ Haimo wa kuatiwa, wa tualiwa kumandekua. Otumãla tuaye va tu nyanyowãila panyãha osi olonjila. Va imbila ocela akulu vaye va kemãla, lolombuale viaye via kutiwa lalienge.

¹¹ Lovevo o kolua, haive o saluka, o sanda ocikolo hu tila unyãli.

¹² Olombonge viove viosi via soka loviti viakuyu vi kasi lakuyu, ana a pia tete. Nda vi tuñunyiwa a lolukila vomẽla wu o lia.

¹³ A Ninivei, asualali vove va soka ño ndakãi. Olombundi viofeka yove via yulukila ovanyãli vove. Ondalu ya lia ovikundiko viove.

¹⁴ Tapeli ovava ocingonja; kolisi olombonge viove; wili vocitunyu, kosi onata; kuati kolofoloma violondopi.

¹⁵ Oko ondalu yi ku lila, haiko osipata yi ku nyõlẽla. Yi ku lia ndolohuma. Liluisi ndoluhuma! Liluisi ndepange!

¹⁶ Va luisa vakuakufũla vove ndolombungululu viokilu. Oluhuma lu tandavaisa avava kuenje lu pãlãla.

¹⁷ Olombuale viove via soka ndapange, vakuavisonẽhua vove ndavanda olohuma vi wila kovimbaka koloneke viovituto, puãi, nda ekumbi li tua, vi tila, kuenje oko vi enda lomue o kũlĩhako.

¹⁸ A Soma ya Asuria, ovangombo vove va pekela, lolombuale viove vi pekela otulo. Omanu vove va sandokaila kolomunda kuenje ka kuli u o vongolola.

¹⁹ Epute liove ka li sakuiwa. Embonjo liove ka li kuete ovihemba. Vosi va yeva ndomo ca pita love va ci panduila momo helie wa puluka kevĩho liove lia enda ño-o?