NAHUMI 2 - Embimbiliya - Bíblia Sagrada em Umbundu

¹ Ocinyõi ca ku katukila. Kapa olondavululi kovimbaka. Lavulula olonjila. Litika vombunda. Kolisako!

² Momo Yehova o tumbulula vali ulamba wa Yakoba, haiwo ulamba wa Isareli, ndaño ovinyõi vio nyõlẽle loku u sandula.

³ Otevele yasualali vaye ya kusukilua, asualali vaye va wala ci kusuka. Eci akãlu a lialeka a ndelenga ndulienge wondalu. Otuvalu tu yaya oku enda.

⁴ Akãlu ovita a ñuala ñuala valuwa, a enda oko loko vovila; a nina ndovimĩhĩ; a pita pita ndoviliakulo.

⁵ Vakesongo va kovongiwa, poku enda va likonjoka. Va yayulako oku enda kocimbaka. Va angiliya ovimãlẽho.

⁶ Olombundi violui vi yikuluka. Onjo ya Soma ya yokoka.

⁷ Inakulu o suluiwa, kuenje ambatiwa. Afeko vaye va leña leña ndolopomba. Va lipupola volonete.

⁸ Ninivei ya soka ndetangi liovava li pita pita. Va vilikiya vati, Tiuki! Tiuki! puãi lomue o tiuka.

⁹ Pundi ulu! Pundi opalata! Ka kuli esulilo liukuasi, pamue liokulua kuovina viosi via tĩla.

¹⁰ Haku nyõlẽhako! Hekunduko! Cosi ca siala upolokoso. Ovitima via fa. Olongolo vi luluma. Oviongo via teka. Lovipala viosi via pongoloka.

¹¹ Elolo liolohosi li kasi pi, pamue ocilala cayove olohosi, oko ohosi yi tuala ocinyama ca kuatiwa, haiko kuli otumãla tuayo, kuenje ka kuli eci ci sakalaisa?

¹² Ohosi ya suyululako ca soka lomãla vayo ya suyuluilakovo olomange viayo, ya yukisa aleva ayo levi via kuatiwa, lovilalo viayo lositu ya nyanyõha.

¹³ Ca popia Yehova Ukualohoka ceci, hati, Tala! Nda ku ñualẽlãpo! Njoka akãlu ove ovita, losipata yi lia ayove ove olohosi. Nyimũla ohute yove kilu lieve, londaka yolomunga viove ka yi yevala vali.