NAHUMI 1 - Embimbiliya - Bíblia Sagrada em Umbundu

¹ Ovitumasuku via tumiwĩla imbo lia Ninivei. Elivulu liovina via mõla Nahumi u Elikosi.

² Yehova eye Suku yesepa, o fetuluinya, Yehova o fetuluinya muẽle, haeye ukuanyeño. Yehova o fetuluinya ava va litamãlãla laye, o solekela ovanyãli vaye onyeño.

³ Yehova o livala konyeño, haeye wa piãla kolohõlo. Lalimue eteke Yehova a yovuisa u wa pia. Onjila yaye yi kasi vocipepe kuenda vehunguhungu. Alende, o-o oneketela yolomãi viaye.

⁴ O lemẽla okalunga kuenje o ka kukutisa. O takatisa olondui viosi. Basiane la Karimele vi uwuka, kuenda avala olonẽlẽho via Levanone a senguluka.

⁵ Olomunda viu lulumĩla loviwulu vi sengeteta. Kokumõlẽha kuaye ongongo yi nyõlẽha, okuti oluali lava vosi va tungamo.

⁶ Onyeño yaye helie o yi tẽla? Helie o tẽla okufeluka kuonyeño yaye? Onyeño yaye yi peseka ndondalu, lovawe a toliwa laye.

⁷ Yehova ukuahenda, haeye ocikolo veteke liohali. Wa kũlĩha omanu va tilila kokuaye.

⁸ Puãi o kungulula olumue ovanyãli vaye. O lupuisila ovanyãli vaye toke vowelema.

⁹ Ehãla lie vu kasi loku tumbila Yehova? Eye o li sulisa olumue. Ka fetuluinya luvali ovanyãli vaye.

¹⁰ Va liwa ndolosongo via litanga. Va pia ndovisaikiti via kukuta.

¹¹ Pokati kene hẽ, ka pa tundile umue wa tumbila Yehova ehãla lĩvi, loku u wenguila usuanji?

¹² Ca popia Yehova ceci, hati, Ndaño va pama, haivo va lova, haimo va tepiwa kuenje va nyõlẽha. Ndaño nda ku talisile ohali, cilo si ku talisa vali ohali.

¹³ Kaliye neya omi yaye ha yi tundi kokuove, kuenje soyola ovikolo viove.

¹⁴ Yehova wa ku handelekela, hati, Onduko yaye ka yi tumbuluiwa vali. Vonjo yolosuku viaye nyõlamo ociñumanũma ca songiwa, lociñumañuma cutale. Ngangiliya eyambo liaye momo wa viha.

¹⁵ Tali kolomunda olomãi viu iya lolondaka viwa, haeye o sapula ombembua. A Yuda, lingainga olofesta viove, lemũlũla ovisila viove, momo ukuevĩho ka ku katukila vali, wa nyõlẽha muẽle.